Tbilisimi qaartartumeerisoqarpoq

- Ruslandip Georgiami iliuutsini sakkortusiartuinnartinniarunigit USA-p Ruslandillu akornanni pissutsit allanngorsinnaapput, USA-p præsidentiata George W. Buship maanna Beijingimiittup nalunaarutigaa.

Georgiap Ruslandillu aaqqiagiinngissuteqarnerat piaarnerpaamik aaqqiiviginiarneqartariaqartoq, nunat tamalaat oqariartuutigaat, pissutsilli maannakkorpiaq qanoq ittuunersut suli nalornissutigineqarlutik.

Georgiamiut oqaatigaat Rusland nunap immikkoortuani Abkhasiami aamma saassussisimasoq. Abkhasia Georgiamiit aamma avissaarniartuuvoq, Abkhasiamiulli nunanut allanut ministeriat Maxim Gunia tamanna ilumuunnginnerarpaa

EU-mit USA-mit nunallu killiit illersoqatigiiffiannit NATO-mit aallartitat maanna Georgialiartinneqareerput, tassani isumaqatigiissitsiniartitsisussaallutik.

Georgia Ukrainemit sakkulersorneqartoq Ruslandimit ippassaq oqaatigineqarpoq.

Georgiamiut sakkulersorunnaarniarnertik ullumi nalunaarutigaat, Ruslandip aallartitaqarfianut ullumi taama nalunaaruteqarput.