Alaskami tatsit imaarukkiartorlutillu ikiliartuinnarmata, silaannaq kissatsikkaluttuinnarpoq.
Fairbanks-imi ilisimatusarfiup, University of Alaska-p, misissuisimanerata tamanna takutippaa, taama nutaarsiassaqartitsivik Journal of Geophysical Research allappoq.
Tatsit 10.000-it sinneqartut, ukiut 50-it ingerlanerini 31 procentit tikillugit ikiliartuinnarlutillu imaarukkiartuinnavissimasut, misissuinermi paasinarsivoq, 1970-illu kingorna tamanna annertunerusumik pisimasoq aamma paasineqarluni.
Alaskami silaannaq kissatsikkaluttuinnartoq ilisimatuunit maluginiarneqarpoq, nunalu qeriuaannartuusaraluartoq aakkiartuinnarluni.
Alaskami tatsit masarsuillu timmissanut aasisartunut pingaaruteqarluinnarput, annertussutsimikkut Norge-tut annertutigimmata, piaqqiorfiullutillu.
Assit 1950-ikkunneersut, 1970-imeersullu misissuinermi tunngavigineqarput, ullutsinnilu digitalteknologii atorlugu assilisat misissuinermi aamma tunngaviullutik.