Tassaarsuartoqarnerata kingorna: Illut taartissat tunniunneqarput
Karrat Kangerluanni qaqqaq siornaak juunip ulluisa 17-anni sisoortoqarmat tassaarsuaqarpoq.
Nunaqarfimmi Nuugaatsiami innutaasut eqqugaanerpaapput, ilaqatariit inuusuttut meeraallu kiisalu angut utoqqaq ajumaarmata, illullu arlaqartut immamut avalagussaallutik.
Sumiiffinni innuttaasut siunissami najugaqarfissatut kissaateqarfigisaanni illut sanaajupput, taakkulu Uummannami, Saattuni, Ikerasanni aamma Ukkusissani sananeqarput.
AAMMA ATUARUK Nuugaatsiaq Illorsuillu saliiffigineqalersut
Ineqarnermut Attaveqaqatigiinnermullu Naalakkersuisoq tamanna pillugu ima oqarpoq:
- Najugaqarfissat kingulliit Ukkusissani tunniunneqarnerini maanna najugaqarfissatut taartissat tamarmik tunniunneqarsimalermata atorneqalermatalu nuannaarutigisorujussuuara, neriuppunga sinaakkusiussat nutaat 2017-imi Karrat Kangerluanni tassaarsuup kingunerisaanik inernileeqataasimassasut, Karl Frederik Danielsen taama oqarpoq
Inissianik taartissanik pingasunik kingullernik, Ukkusissani sananeqartunik tunniussisoqarpoq, taamaalilluni sanaartorneq sapaatit akunnerisa naaneranni naammassineqarluni.
Illut taartissat inuttaassannut tunniunneqarnissaat 2019-imi novembarimili kinguaattoorpoq, nunaqarfimmi illut sananeqarnissaannut sananissamut pisinnaasunik amigaateqartoqarnera peqqutigalugu.