Tassaarsuarmit eqqugaasut initaartut
Aalisartoq Knud Peter Jensen 25-inik ukiulik Illorsuarneersoq aappani meerartillu maanna Saattuni initaarput eqqissiallaatigeqisaminnik.
- Qanu iluamik nassuiassallugu nalunarpoq uagutsinnut isumaqaruttormat, Knud Peter Jensen ukiuni marlunni inissaminik utaqqisimasoq initaarluni KNR-imut oqarpoq.
Taakkua tassaarsuaqartoqarnerani Illorsuarnit qimagutsinneqarnermi kingorna Ilulissani, Qaarsuni Uummannamilu nunasisarsimapput maannalu nunaqarfigerusutaminni initaarnertik iluarisimaarpaat.
- Eqqissiallannartorujuussooq uagutsinnut, assorujuk qujamasunnarpoq taamannak ikiorneqarnerput, ataatsimik ukiulimmut ataataasoq Knud Peter Jensen oqarpoq.
AAMMA ATUARUK Tassaarsuarmit eqqugaasut inissianut nutaanut siulliit nutsertut
Taanna nunaqarfiusimasumi Illorsuarni peroriartorpoq. Aatsaallu namminerisaminik ineqarluni nunaqarfigiligassamini Saattuni najugaqalissaaq. Saattullu najugassatut toqqarnera piaarinaatsoorneriinnaanngilaq.
- Pissanganalaarpoq. Uagutsinnut pissanganarpoq aatsaat misiliinialeratta Saattuni nammineq ineqarluta, Saattut toqqarsimavarput nunaqarfikutsinnut Illorsuarnut assingummat sikusarnera, sikujartortarnera, ukiariartortarnera aasariartortarneralu Illorsuarnut assingummat taanna toqqarsimavarput Saattut, Knud Peter Jensen oqarpoq.
Inissialiornissamut pilersaarut tamarmi katillugu Namminersorlutik Oqartussanut 110 millionit koruuninik aningaasartuutaavoq, inissiallu taakku maanna Avannaata Kommunianut siunissami attartortitsisalertussamut tunniunneqarput.
