Tasiusami ujaasineq: Angut 26-nik ukiulik suli nanineqanngitsoq
Angut pineqartoq Tasiusamit arfininngormat ullaakkut avalareerluni maqaasineqartutut nalunaarutigineqartoq suli nanineqanngilaq.
Issittumi Sakkutooqarfimmeersut qulimiguulimmit umiarsuarmiillu alapernaarsuummit Lauge Kochimit sumiiffimmi ujaasipput. Kajumissutsiminnillu ikiuuttut aamma ujaasipput. 26-nilli ukiulik suli nanineqanngitsoq, Issittumi Sakkutooqarfiup tusagassiisartua Ida Birkemose paasissutissiivoq. Toqqorsivimmit assi..
Allattoq Anders Dall
juulip 20-at 2020 14:44
Nutserisoq Ivik Kristiansen
Issittumi Sakkutooqarfimmeersut namminnerlu kajumissutsimik ikiuuttut aalisartumik angummik 26-nik ukiulimmik Upernaviup avannaani Tasiusap eqqaani arfininngormalli ujaasipput. Angut taanna Tasiusamit kisimiilluni arfinngormat ullaakkut avalappoq. Umiatsiaalu aquttoqanngitsoq ullaap tungaani takuneqarmat annerusumik ujaasisoqalerpoq. Politiininngaanneersoq Søren Bendtsen taama paasissutissiivoq.
Issittumi Sakkutooqarfik ujaasinermi ataqatigiissaarisuuvoq. Sakkutooqarfimmeersullu qulimiguulimmit umiarsuarmiillu alapernaarsuummit Lauge Kochimit sumiiffimmi ujaasipput. 26-nilli ukiulik suli nanineqanngitsoq, Issittumi Sakkutooqarfiup tusagassiisartua Ida Birkemose paasissutissiivoq.
Ujaasineq ullumi ullup-qeqqanut unitsinneqarpoq.
