Tasiorta: Nalunaarusiaq suliassanut kinguarsaataaginnarpoq

Ilaqutariinermut peqqinnissamullu naalakkersuisoq ullumi oqarpoq nalunaarusiaq februaarip ulluisa 25-anni saqqummersussaq utaqqimaartariaqarlugu. Tamanna suliamut kinguarsaataaginnartoq, peqatigiiffiup Tasiortap siulittaasua, Arnaq Grønvold, oqarpoq. - Pissanganarpoq nalunaarusiaq qanoq imaqassanersoq, kisianni nalunngilarput kinguaassiutitigut innarlerneqartartut ukiumut qassiusarnersut. Taakku amerlasoorujussuartut nalilernikuuagut, taamaammat nalunaarusiamik sooq utaqqeqqaarnissaq paasisinnaanngilarput. Asuli suliassanik kinguarsaataaginnartutut nalilertariaqarparput, Arnaq Grønvold oqarpoq. Nalunaarusiap, (Børnenes trivsel og forældrenes ressourcer), Meeqqat atugarisaat angajoqqaallu pissarititaat, februaarip ulluisa 25-anni saqqummersussap utaqqimaarneqarnera pissutigalugu, kinguaassiutitigut innarliisarnerup ingerlaannarnissaa Arnaq Grønvoldimit ernumagineqarpoq. - Kinguaassiutitigut innarliisartut katsorsarneqarnissaminnut pisariaqartitsilluinnarput. Katsorsarneqanngikkaangamik innarleeqqinnissaat qanittuararsuusarpoq. Tamatta tamanna nalunngilarput, taamaammat innarlerneqartartut ikiliartunnginneranut kinguneqartussaavoq. Ajornartorsiummik takunnikkusunnginneq, ajornartorsiummillu suliniuteqartunut suleqataarusunnginneq, naalakkersuisumiit taama ersaritsigisumik nalunaarutigineqartoq tujorminarpoq, Arnaq Grønvold oqarpoq. Peqatigiiffiup Tasiortap Kalaallit Nunaanni Danmarkimilu naalakkersuisut januaarip ulluisa 18-anni kajumissaarpai meeqqanik inuusuttuaqqanillu kinguaassiutitigut atoqateqarusuttartut katsorsarneqartalissasut. - -- Kajumissaaruterput naalakkersuisuniit suli qisuariarfigineqanngilaq. Peqatigiiffiulli siulittaasua oqarpoq, anguniagartik angutinnagu nipangernaviaratik.