Tasiorta aningaasaliiffigineqarnerusariaqarpoq
”Kalaallit Nunaanni Meeqqat”-nik taallugu meeqqat ukioqanngitsuniit 14-inut ukiulinnut ukiullit atugaannik misissuinerup inernerinik nalunaarusiaq ippassaq saqqummerpoq, tassanilu erserpoq kinguaassiuutitigut atornerluinerit imigassartorpallaarnerillu imminnut ataqatigiikkajuttut.
Anaanat apersorneqartut 35 procentiisa kinguaassiuutitigut namminneq atornerlunneqartarsimanerminnik oqarnerat Peqatigiiffiup Tasiortap tupaallaatiginngilaa.
- Imatut tupanngilagut. Nalunngilarput kinguaassiuutititigut innarliisarneq annertuallaarujussuartoq. Pisariaqarluinnarpoq siunnersuinissaq, katsorsaanissaq anaanaannaanngitsunut aamma ataataasunut, meeqqanut inuusuttunullu eqqugaasunut ilaquttanullu annertusartariaqarparput, Arnaq Grønvold kaammattuivoq.
Peqatigiiffiup oqartussanit maannamut 0,5 millioni koruuninik taperneqarsimasup amerlanernik aningaasaliisoqarnissaa ujartorpaa.
- Kinguaassiuutitigut atornerlunneqarsimasunut katsorsaavittaartariaqarpugut, allaffittaarluta, soorlu imigassamik ajornartorsiutillit katsorsaaveqartut. Nunatsinni pisariaqarluinnarpoq, oqarpoq.
Tasiortap oqarasuaatikkut siunnersuisarfia 141 sapaatip-akunnerata ingerlanerani sisamariaannarluni ammasarpoq.
-Naammanngilaq, ammasarfivut sivitsortariaqarput. Pisariaqartinneqartorujussuuvoq, eqqartuussivitsigut suliat kinguaassiuutitigut atornerlunneqarnermut tunngasut ukiuni kingunnerni amerlasoorujussuanngorsimasut qiviaannartariaqarnerarpai.
- Misissukkat takutippaat anaanat apersorneqartut 35 procentii atornerlunneqarnikut. Anaanaannaanngillat atornerlunneqarsimasut. Ataataasut aamma qassiuppammita? Misissuinermi angutit aperineqarsimanngillat. Nalunngilarpulli angutit arlalippassuit aamma kinguaassiuutitigut atornerlunneqarsimasut, Arnaq Grønvold naggasiivoq.