Tasiilaq kunngikkormiunit tikeraartoqalersoq

Prinsesse Benedikte ulluni sisamani Tasiilamut tikeraarnini pingasunngornermi aallartissavaa, ilaatigut ulloq unnuarlu meeqqanut angerlarsimaffik, utoqqaat illuat kiisalu napparsimmavik pulaassallugit.

Meeqqanut Ilaqutariinnut Atuarfinnullu pisortaq Helene Broberg Berthelseni tikeraartoqarnermut kommuni sinnerlugu ingerlatsisuuvoq, Prinsessellu tikinnissaanut qilanaarluni.

- Prinsesse Benediktep tikeraarnissaa Tasiilamut qamuuna nuannaarutigeqaarput sualummillu aamma takutitassagut Tasiilami, tassalu meeraaqqeriviit nutaarluinnaat kiisalu aamma ammerivik taavalu sanaluttarfik takutinnissanut qilanaarpugut.

AAMMA ATUARUK Prinsesse meeqqanik Tasiilameersunik pulaartoqartoq

Meeqqerivimi Pingajeqqani meeqqat pingasut arfinillillu akornanni ukiullit Prinsessemik pulaartoqarnissaminnut aamma qilanaarlutik piareersartut pisortaata Ane Kuitsep oqaluttuaraa.

- Prinsesse Benediktep pulaarnerani meeqqat marlunnik atuissapput. Meeqqat erinarsuutaat Bamse sinippoq tunumiusuunngorlugu atussamaarpaat.

Erinarsornissamullu ilinniartinneqarluarput.

 - Erinarsorpaluttut iserfigigakkit aperivakka sunissaminnik piareersarnersut. Pulaartoqassamaartunngooruna Prinsessegooruna Benediktep pulaassagai.

AAMMA ATUARUK Meeqqat Tasiilameersut Amalienborgimiittut

Tasiilami katersugaasivik aamma pulaarneqassaaq, erinarsoqatigiit tusarnaartitsissapput aamma qilaatersortoqassalluni. Pilersaarusiortullu piareersimalluartut Helene Broberg Berthelsen oqarpoq.

- Piareersarluarsimavugut sutigullu tamatigut sulinissatsinnut Tasiilami piareeqqalluta. Minnerunngitsumillu soorunalimi Prinsesse Benediktep aamma iluamik tikilluaqqusaanissaanut piareersimalluinnarluta pivugut.

Prinsesse Benedikte arfininngornermi angerlamut aallartigani pinngortitamut aamma angalaarunneqassaaq.

AAMMA ATUARUK Meeqqat Tasiilamiut Gentoftemiullu takorniuuttut