Tasiilaq Italiami tusaamanerlugaalerpoq
-Inuit aalakoortut unnuaq naallugu illoqarfimmi angalaartarput. Meeqqat iluamik nakkutigineqanngillat. Imminut toqunnerit, ikiaroornerit imigassarlu killeqanngiusattumik atugaapput – aviisimi Corriere della Sera-mi, allaaserisat ilaatigut taama nipaqarput. Allaaserisani aamma ersersinniarneqarporlusooq, italiamiu Tasiilami najugalik tassaasoq, Tasiilami innuttaasunik katsorsaasartoq.
Italiamiu Tasiilami najugalik illoqarfimmi takornarniartitsivimmit, Destination East Greenlandimit, allaaserisat pillugit attaveqarfigineqaraluarpoq, allaaserisalli taassuma ilisimasaqarfiginnginnerarpai. Taamaammat aviisiliortup Tasiilamut qaaqquneqarnissaa kommunalbestyrelsimut ilaasortanut siunnersuutigaa, kommunalbestyrelsilu sapaatip-akunnerani kingullermi ataatsimiikkami tamanna akuersissutigaa, ataatsimiinnermit eqikkaalluni allakkani tamanna erserpoq. Kommunip ingasattumik eqqunngitsumillu allaaserineqarnera naammagittaalliutigalugu kommuni aviisimut "Corriere della Sera"-mut ammasunik allagaqassasoq, Destination East Greenlandimit siunnersuutigineqarpoq.
