Tasiilap eqqaavissuata salinneqarnera suliffissaqartitsisoq

Tasiilaq ukiorpassuarni eqqakkanik eqqaasarnermik ajornartorsiuteqarsimavoq, tassami illoqarfimmi ikuallaasarfeqaranilu eqqakkanik allatut igitsisarfeqanngimmat.

Taamaammat Namminersorlutik Oqartussat aamma Kommuneqarfik Sermersooq eqqakkat ajornartorsiutaanerisa iluarsiiffigineqarnissaannut saliinissamut amerlasuunik aningaasaliissuteqarput - aammali suliffissanik amerlanerusunik pilersitsillutik. Kommuneqarfik Sermersooq tusagassiorfinnut nalunaaruteqarluni taama allappoq.

- Tasiilami suliffissanik nutaanik pilersitsiortortoqarmat nuannerpoq, sulisussallu arfineq pingasut tikilluaqqunissat qilanaaraarput, Sanarfinermut Avatangiisinullu Ataatsimiititami siulittaasoq, Mille Søvndahl Pedersen, taama oqarpoq.

Eqqakkat Danmarkiliaanneqassapput

Saliinissamut atatillugu qisunnik sequtserummik, naqitsissummik atortussanillu pisariaqartinneqartunik allanik pisisoqarpoq. Savimerngit, biilit assakaasukui igitallu avatangiisinut ulorianaatillit umiarsuakkut Danmarkimut nassiunneqartassapput, igalaamernit sequtserneqassapput, assaanermilu immiissutitut atoqqinneqartassallutik, qisuit igitat sequtserneqartassapput inaalitsivimmullu inaalinneqarlutik, kisiannili ulluinnarni eqqaavimmut iginneqartartut ballinut naqinneqartassapput, kingusinnerusukkut atoqqitassanngorlugit inaalitsivimmiitinneqarlutik, kingusinnerusukkullu umiarasuakkut nassiunneqartassallutik.

Saliinissaq 2015-ip sinnerani ingerlanneqassaaq.