Tasiilami Vajgatip qitigiarpalaaq
"Qullissara" tassaavoq oqaatsit nipilersukkallu atorlugit illoqarfik aamarsuarfiusimasoq 1972-mi matuneqartoq Qullissat pillugit oqaluttuaq. Taanna nunasiaatitut aqunneqarnerup kingunerisinnaasaatut assersuutitut taamanerniit qaqilerneqartarpoq.
Qullissat inuiaat assigiinngitsut najugaqarfigisarsimavaat aamarsuarsiorfimmi nunani allaneersut sulisarmata.
Illoqarfik nipilersornikkut nunatsinni siuartuusimavoq Vajgatip qitigiai hawaii-guitarimik nunatsinni ilisimaneqalersitsisut pillugit.
Isiginnaartitsiutigaluni nipilersorneq "Qullissara" aasaq Qullissani takuteqqaarneqarpoq illoqarfiup inuerunneranit ukiut 40-nngornerat malunnartinniarneqarmat.
Isiginnaartunit assut tigulluarneqarpoq. Erinnat tusaqqoornartuartut nunatta oqaluttuassartaanik pingaarutilimmik oqaluttuanik mamarsaasikkat suli ullutsinni tulluartuusut paasineqarmioq.
Isiginnaagassiamik suliarinnittuullunilu ilitsersuisuuvoq Qullisarmiu Makka Kleist. Nipilersoqatigiillu Kimmernaq Kjeldsen, Pilu Noahsen, Mike F. Thomsen, Hans Jørgen Damgaard, Jens Nielsen aamma Villads Sandgreen unnugu Tasiilami tusarnaartitsissapput.
Taanna sineriammi angalaarnermut aallarniutaavoq qaammatinilu aggersuni Nunatta isiginnaartitsivianeersut Aasiannut, Ilulissanut, Qasigiannguanut, Sisimiunut, Maniitsumut, Narsamut, Qaqortumut Nanortalimmullu tusarnaartitsiartoqattaassapput.
Sapaatip akunnerata naanerani tulliuttumi septemberip aallaqqaataani aappaanilu Nuummi kulturikkut illorsuarmi Hans Lyngep inersuani "Qullissara" takutinneqassaaq.