Politiit: Tasiilami savilersortoqartoq - inuk qungatsimigut kapineqartoq
Kalaallit Nunaanni Politiit tallimanngornermi ulapputeriarlutik inuit arfininngornermi eqqissisimanerusimapput.
Politiit pigaartuisa pisortaat Aputsiaq Hansen taama oqarpoq.
- Aap, inuit eqqissisimanerusmapput. Akissarsisoqarsimanerali suli malugaarput, angerlarsimaffinni aqqusinermilu eqqissiviilliornerit, taanna oqarpoq.
Ikiaroornartumik hashimik anngiortumik eqqussuisoqarneranut atatillugu sumiiffinni assigiinngitsuni pakasaalluni misissuinerit, biilinik ajutoornerit, immakkut angallattunik ujaasinerit savilersortoqarneranillu suliat marluk, savilersornissamillu sioorasaarineq aamma suliassaasimapput.
Inuit arfininngornermi ataatsimut isigalugu eqqissisimanerupput, ataatsimilli savilersortoqarluni.
Tasiilami savilersortoq
Politiit inuk savilersortoq pillugu nalunaaqutaq ualikkut sisamanngulersoq nalunaarfigineqarput, paasissutissalli ikittuinnaallutik.
- Politeeqarfimmulli orniguttoqarpoq, sumiiffiit ilaanni eqqissiviilliortoqarnera nakuuserniartoqarneralu nalunaarutigineqarluni, Aputsiaq Hansen oqarpoq.
Politiit ornigummata inuk ataaseq qungatsimigut kapineqarsimasoq siumorpaaty. Inuup taassuma qanoq issusaa ullumi ilisimaneqanngilaq, ikilingaatsiarsimanngitsorli oqaatigineqarpoq.
- Savilersorsimanerarneqartorli tigusaraarput.Eqqartuussivitsigut suliarineqarnissaa pillugu sassartinneqarpoq, tigummigallagaanissaalu aalajangiiffigineqartussanngorluni, politiit pigaartuisa pisortaat oqarpoq.
Tasiilami politiit suliaq suli misissuiffigaat.
Inatsisinik unioqqutitsilluni biilinik ingerlatsisoqartoq
Inatsisinik unioqqutitsillutik biilinik ingerlatsisut pillugit suliat marluk tallimanngornermi suliarineqarput.
Narsami inuit marluk ATV-mik ingerlatsisut siumorneqarput, ATV-t aquttup saniatigut ataasinnaarmik ilaasoqarsinnaatitaagaluarput.
ATV-mik ingerlatsisoq biilinik ingerlatsisinnaanissamut aamma allagaqartaqanngilaq.
ATV-t Sisimiuni aamma unitsinneqarsimapput, ingerlatsisoq biilinik ingerlatsisinnaanermut aamma allagaqartaqarsimanani.
- ATV-nik ingerlatsiniaraanni allagartaqarnissaq innuttaasut paasisariaqarpaat. Ingerlatsisoq tamanna pillugu unnerluutigineqassaaq, Aputsiaq Hansen oqarpoq.
Nuummi politiit biilit niffarlukumut aporsimasut arfininngornermi siumorpat. Aqutsisup imigassartorsimalluni biilinik ingerlatsisimasutut pasineqarpoq. Biilinik ingerlatsisoq napparsimmaviliaanneqarpoq tassanilu aaversilluni, imigassartorsimalluni biilinik ingerlatsisimasutut misissuiffigineqarneranut akissutissat suli utaqqineqarput.
