Politiit: Savilersortoqarpoq, umiatsiaq kivilluni assigiinngitsunillu pisoqarluni

Januaarimi ataatsimut isigalugu inuit eqqissisimamasimapput, akissarsisoqarneratali kingorna assigiinngitsunik aamma pisoqarsimalluni.

Akissarsisoqarnerata kingorna politiit ulappussimapput:

- Akissarsisoqarnerata kingorna pisoqaaluppoq. Politiit ulappussimapput, feriepengennattoqarneralu aamma pissutaaqataasinnaavoq, Kalaallit Nunaanni Politiit pigaartuisa pisortaat Aputsiaq Hansen oqarpoq.

Savilersortoqartoq

Aasianni savilersortoqarpoq.

Inuk aarasalluni Aasianni napparsimmaviliartoq politiit ippassaq unnukkut nalunaaqutaq arfineq-pingasunngulersoq nalunaarfigineqarput.

- Politiit ornigupput, angullu savimmik arlaleriarluni kapineqarsimasoq paasivaat, Aputsiaq Hansen oqarpoq.

Politiit savilersorsimanerarneqartumik kingorna tigusarinnipput, tigusarineqartullu tigummigallagaanissaa pillugu ullumi sassartinneqassalluni.

- Savilersorfigineqartup qanoq issusia ilisimanngilara, pinerluffigineqartorli eqqumavoq oqaaseqarsinnaallunilu, politiit pigaartuisa pisortaat oqarpoq.

Nuummi savilersorniarluni aamma sioorasaarisoqarpoq.

Taxanik ingerlatsisup savilersorniamit sioorasaarneqarnera, akiliiumanngitsorlu pillugu politiit ullaaq nalunaaqutaq arfineq qaangerlugit tanneq sisamat missaanni kalerrinneqarput.

Politiit pisumik misissuigasuartut politiit ilisimatitsissutigaat, savilersorsimasutullu pasisaq tigusarineqarluni.

- Tigusarineqartoq suli sassartinneqanngilaq, suli killisiuisoqarnikuunngimmat, politiit oqarput.

Umiatsiamit sikup qaavanut

Inuup umiatsiamik Nanortalimmit Qaqortuliartoq tikissimannginnera pillugu nalunaaruteqartoqartoq politiit oqaatigaat.

Politiit Issittumilu Sakkutooqarfiup nalilersuereernerisa kingorna maqaasineqartoq ujaarineqalerpoq.

Politiit angut ujaarineqartoq sikup qaavaniittoq ullaap tungaani nalunaaqutaq qulit qaangilaaraat nassaarivaat.

- Umiatsiaa kivisimavoq, qanorlu pisoqarsimanera suli misissuiffigineqarluni. Inuk pineqartoq ajunngitsoq Qaqortuliaanneqarpoq, Aputsiaq Hansen oqarpoq.