Tasiilami sanaaluttartut nutaamik sullivittaalersut
- Tasiilami sanaaluttartut aallartitaat oqaloqatigaakka, taakkulu Stunkenimi sanaaluttarnermi atortorissaarutitigut atugaqartitaanertik naammagittaalliuutigaat, borgmesteri oqarpoq.
Taamaammat ukiup tullianut missingersuutitigut 2 millionit koruuninik immikkoortitsinikkut sanaaluttarfik ininut nutaanut nuutsinneqassaaq, inillu nutaat ullumikkut eqqartuussivittut atorneqartumiissapput. Eqqartuussivik illoqarfiup kommunip allaffiata illutaanut nuunneqassaaq.
- Tunumi sanaaluttarnikkut eqqumiitsuliat qangaaniilli ileqqorineqartoq naapertorlugu suliarineqartartut eriaginissaat inerisarnissaallu pingaaruteqarpoq. Sanaaluttartut init ullutsinnut naleqquttut atorlugit sulinermi pitsaanerusunik atugassaqartitaalernerat nuannaarutigaara, borgmester Asii Chemnitz Narup oqarpoq.
Eqqartuussivik iluarsartuunneqassaaq, iluarsartuunneqareerpallu aatsaat sanaaluttartut nutsersinnaapput, sanaaluttarfissarlu peqatigiiffittut qaammatikkuutaartumik akiliuteqarfiusussatut ingerlanneqassaaq, Kommuneqarfik Sermersooq tusagassiorfinnut nalunaaruteqarluni taama allappoq.
