Tasiilami piterarpoq
Tasiilami Kulusumilu piterarpoq. Anori taanna sermersuarmiit nakkarsaarnermini sakkortoorsuanngorsinnaavoq. Taamaammat Tasiilami atuarfik ullumikkut matoqqavoq aammalu Kulusumi atuartut mikinerit angerlarsimaannaqquneqarlutik.
Politiilli eqqissisaapput piteraq ullumikkut tunumut pitoruttoq sakkortorujussuanngitsoq.
- Anoraasuasarnerit sakkortorujussuanngillat. Kisianni persernera pissutigalugu assut isikkiviluppoq, Tasiilami politeeqarfimmiit Ole Lundblad KNR-imut ilisimatitsivoq.
DMIp ilimasaarutaa malillugu Tasiilami anori ualimut qatsoriartulerumaarpoq.
Tunumiinnaanngitsorli silarlunnpoq. Nuummi bussit illoqarfiup ilaanut Qinngutsinnut ingerlaarnertik ullaaq unitsikkallarpaat perserpallaarnera pissutigalugu. Aamma Qeqertarsuatsiaani atuartut minnerit qinnuigineqarput angerlarsimaannaqqullugit. Bussilli pisarnertut ingerlaaqqilereerput taamaattorli kinguaattooqqasinnaallutik.
Anorili sakkortorujussuanngillat Air Greenlandip timmisartui marluk ullaaq manna Nuup mittarfianiit qangattarsinnaasimasut Air Greenland KNR-imut ilisimatitsivoq. Ilanngullugu ilaasussaminnut ilisimatitsissutigaat timmisartut aallarnissaat timmisartuutileqatigiiffiup nittartagaani http://www.airgreenland.gl-mi malinnaaffigineqarsinnaasut.