Pinngitsaaliilluni arnerinerit arlallit Tasiilami politiit misissuiffigileruttorpaat. Pinerluuteqarsimasumik tigusarinninneq kingulleq ataasinngormat pivoq, tassa arnap pinngitsaalisaalluni arneriffigineqarsimanini nalunaarutigimmagu. Sapaatip-akunnerata naanerani taamatut nalunaaruteqartut taanna pingajoraat.
Pinngitsaaliilluni arnerisimassangatinneqartoq politiit ataasinngormat ualikkut nassaaraat tigusaralugulu. Misissuinerup ingerlanneqarnerani sapaatip-akunnerini sisamani taanna tigummineqarallassaaq.
Sisimiuni takornariat marluk qulimiguulimmit marlunngormat aamma annaanneqarput. Taakku Kangerlussuarmiit Sisimiunut pisuinnarlutik ingerlaniarsimapput, aqqutissamillu annersaa aqqutigereerlugulu apussuarmit ingerlaqqissinnaajunnaarsimallutik.
Nunap-assinganik oqarasuaammillu satellitsikkoorsinnaasumik silatusaarlutik nassataqarsimapput, taamaalillutillu Sisimiuni politiinut sianersimallutik, oqarlutillu, ingerlaqqissinnaajunnaarlutik utersinnaajunnaarlutillu. Takornariat taakku marluk ulloq unnuarlu ataaseq apummeereersut annaanneqarput, Sisimiuni politeeqarfimmi pisortaq oqaluttuarpoq.