Tasiilami nunaqarfiinilu atuartut nerisaqartinneqartarnerat ingerlalluarpoq

Ingerlalluarpoq, pisariaqartinneqarpormi tamanna, atuartummi ilaat nerisassaminnik nassaratik atuariartortut naammattoorneqarsinnaasarput, Tasiilami Alivarpiup pisortaata tullia, Anna Kuuitsi Kukku, oqarpoq. Tasiilami nunaqarfiinilu tallimaasuni atuartut 390-it nerisaqartinneqartarnerat ukiumut 890.000,00 koruuninik akeqarpoq, taakkualu affaat, tassa 50 procentiat, Namminersornerullutik Oqartussat akilertarpaat.

Tasiilami nunaqarfiinilu atuartut 433-upput taakkunanngalu 390-it atuarfiup nerisaqartitsinera atorlugu.

Iffiat kilitat marluk qallersuuserlugit iffiaq qaqortorlu ataaseq atuartumut ataatsimut ullormut tunniunneqartarput, ataasinngornermiit sisamanngornerup tungaanut. Atuartut kissartunik tallimanngornikkut sassaallerfigineqarput, Bøf, burger imaluunniit kukkukuuaraq sassaalliutigineqartarlutik. Tasiilap nunaqarfiini atuartut puisip neqaanik ilaatigut sassaallerfigineqartarput.

Atuartunut ullaakkorsiutinik sassaallertarneq unitsinneqarpoq, atuartut ullaakkorsiutinik nerinissaminnik pisariaqartitsinngitsut paasinarmat.

Tasiilami Alivarpiup pisortaata tullia, Anna Kuuitsi Kukku, taama oqarpoq.

Atuartut nerisaqartinneqarnerat ukiumut 890.000,00 koruuninik akeqarpoq affaalu Namminersornerullutik Oqartussanit akilerneqartarpoq.