Tasiilami maaji peqqinnaartuutinneqarpoq
Illoqarfik tamarmi suliniummi peqataalluarsimavoq aammalu pisortat namminersortullu suliffeqarfii ingerlatat iluarisimaarlugit nalunaarllutik. Atuarfimmi inuit timersuutaat, angallannermi malittarisassat allatigullu sammisassat "Maaji peqqinnartuutiguk"-mi ingerlanneqarsimapput. Pilersuisoq aamma suleqataavoq naatitat akikillillugit maajimi peqqinnartumik nerisaqarnissamut innuttaasut periarfissikkamigit.
- Ukiormanna "Maaji peqqinnartuutiguk" aallartikkatsigu siornarniit pitsaanerusumik ingerlatsisinnaalluta. Ukiormannalu Kommuneqarfik Sermersuumiit tapiiffigineqarluarpugut atortunik amigaatigisatsinnik pisiniarnermut atukkatsinnik. Aamma naatitat 390 kilot Islandimiit tikisippagut arpannerni peqataasunut akeqanngitsumik agguaanneqartut, Patrick Abrahamsen Tasiilami "Maaji peqqinnartuutiguk"-mi aqutsisut ilaat oqarpoq.
Iluatsilluartut ilagaat unnuap qeqqani arpatsitsineq peqataasullu ukioqqortussutsini tamani peqataammata illoqarfik nuannisarfiulaavissorpoq.
- Unnuap qeqqani arpanneq aatsaat taama peqataasoqartigaa. Arpaqataasut 206-upput. Ukiormannalu kusanartunik pinnatassaqarpoq meeqqallu ullup ingerlanerani kingulliarsimallutik peqataarrapput. Taama iluatsilluartiginera aaqqissuisuniit assut nuannaarutigaarput aappaagulu pisussaq qilanaarilereerparput peqataasut suli amerlaneruteriassamaaratsigit, Patrick Abrahamsen oqarpoq.
Ukiorlunnerali aaqqiissuussamut akornussivoq tassa sikuerluarsimanngimmat qajartortitsinerit pinngitsoormata. Taassumali saniatigut pisut allat iluatsilluarput.
- Aaqqissuussami matumanisut pissartumi nuannequtaavoq assut pisariaqartinneqartoq malunnartarmat. Qamuuna nuannaajummernartarpoq meeqqat aaqqissuussanut assigiinngitsunut peqataaniarlutik takkussorluartarmata, Patrick Abrahamsen oqarpoq.
