Tasiilami inuusuttuaqqat susassaqarnerulerput
Tamannalu piviusunngorsinnaalersimavoq Namminersornerullutik Oqartussat immikkut aningaasanik ikiuigasuarnerata kingorna.
Tamannalu Tasiilap atuarfianni tarnip nakorsaata Kirsten Berngaard-ip iluatsilluartutut oqaatigaa.
Inuusuttuaqqat Tasiilamiittut sumiiffissaqarlutik asuli silami qiaakulullutik aniiginnartartut maanna suffissaqalerput. Inuusuttuaqqat unnuk nuannersumik nuannaarlutillu aqqusinermi, asuli qiiallutik angalaaratik, timersortarfimmi timitik iluamik peqqinnartumillu atorsinnaanngorpaat.
Timersortarfimmi timitik atorlugit sukisaarsaartarneq inuusuttuaqqanut iluaqutaasaaq, inuuneq nuannernerusoq atulissagamikku, inuunertillu immersorluarsinnaanerulerlugu.
Ajoraluartumik uku aningaasat pinikuusavut ukioq mannamuinnaq atuupput, tassa aappaagumut timersortarfimmi susassaqartitsisarneq atuutsikkusukkaluaqaarput, kisiannili tassa aningaasat apeqqutaapput.
Nalunngilarpummi aamma tamanna annertuumik maani Tasiilami pisariaqartinneqaraluartoq.
- Pinaveersaartitsinermut aamma annertuumik iluaqutaavoq. Aningaasat Namminersornerullutik Oqartussanit pisavut, assut iluautigaagut, inuusuttuaqqammi maanna susassaqalerput, oqarpoq.
