Tasiilami imigassat kimittuut matuneqarput
Ilaqutariinnermut naalakkersuisoqarfiup Tasiilami meeqqanut ilaqutariinnullu immikkut suliniuteqarnialernerani, neqeroorutit kommunip siusinnerusukkut meeqqanut inuusuttuaqqanullu kinguaassiutitigut, tarnikkut timikkullu atornerlunneqarsimasunut ikiorsiinissamik katsorsarneqarnissamillu neqeroorutigisarsimasai ukioq kingullerli unitsinneqarsimasut maanna ingerlaqqittussanngorput.
Kommunip ikiorsiinissamik neqeroorutaa ukioq kingullerli unissimavoq, ilaatigut inunnik isumaginnittoqarfimmi tarnip pissusaanik ilisimasalimmik atorfinitsitsiniarneq ajornakusoorsimammat.
Maannakkulli immikkut suliniartoqarnerani ilaqutariinnermut naalakkersuisoqarfik ikiortigalugu tarnip pissusaanik immikkut ilisimasalimmik atorfinittussamik ujartuineq ingerlanneqassaaq. Tamanna aasaq manna sulinngiffeqareernerup kingorna ukialerneraniluunniit pisinnaassasoq neriuutigineqartoq ilaqutariinnermut pisortaqarfimmi pisortap Martha Lund Olsenip radioaviisimut oqaatigaa.
Aamma oqaatigaa maannakkut Tasiilami meeqqat avataanut inissinneqarsimasut angerlarsimaffigisimasaat, børnehjemmiusimasoq aserfallatsaalillugu suliarineqalersoq, utaqqiisaagallartumillu illu atornerluisunut katsorsaavittut Qaqiffiup immikkoortortaatut atorneqartussatut naatsorsuutigineqarpoq.
Tassani inunnik isumaginninnermi sullissinermi misilittagallit pikkorissarnerup ingerlanerani akuutinneqassapput, Qaqiffiullu katsorsaariaasiani periutsit atorneqassapput, katsorsagassat pisariaqartitaat ajornartorsiutaallu paasineqarluarnissaat anguniarlugu. Periuseq tamanna iluatsittumik Qeqertarsuarmi Qaanaamilu misilittagaqarfigineqarpoq.
Aasaq mannalu Tasiilami meeqqat aasap nuannersua misigissanngoraat qularutissaanngilaq. Tasiilap Alivarpiani tarnip pissusaanik immikkut ilisimasalik Kirsten Berngaard oqaluttuarpoq, Danmarkimiit aamma Tasiilamukartoqangajalersoq, atuartunut sammitillugu illoqarfimmi cirkus-eqartitsisussanik. Aamma ullumi Tasiilami tikippoq, Mexico-miu eqqumiitsulianik qalipaasartoq, siusinnerusukkut suliniummi MATU-mi Nuummi sulisimasoq. Taassuma meeqqat inuusuttuaqqallu qalipaanermik ilinniartissavai, aamma aalisariarnerit asiarsimaarnerit, amernik mersornermik ilinniartitsinerit kiisalu tivanerit erinarsornerillu ingerlanneqassapput. Pisussanik aaqqissuussinerit ilaatigut Nuna Fond-imiit Augustinus Fondimiillu aningaasaliiffigineqarsimasut Tasiilap alivarpiani tarnip pissusaanik ilisimasalik Kirsten Berngaard pilersaarutit pillugit oqaluttuarpoq.
