Tasiilami eqqaavissuarmi saliisoqartoq
![](/sites/default/files/styles/image_934x467/public/article_images/gr1a2164.jpg?itok=OUwmaCuH)
![](/sites/default/files/styles/image_934x467/public/article_images/gr1a2155.jpg?itok=WUbr92Od)
Tasiilamut qulimiguulimmik tikittut ukiorpassuarni takusartagaat siulleq tassaavoq illoqarfiup eqqaavissua ulikkaartoq.
Tamannali qaangiunnialerpoq.
Kommuneqarfik Sermersooq juuni qaammataagaa eqqakkanut ikuallanneqarsinnaasunut poortuussuarmik pissarsivoq, taamanili Tasiilami eqqakkanik sulisut tallimat poortuillutik ulappussimapput. Eqqakkanik poortugarsuit kingorna umiarsuarmik Nuummukaanneqartarput.
- Qaammatit pingasut ingerlaneranni eqqakkanik poortugarsuit 300-it kontainerinut 50-inut immiunneqarput. Ilaat saviminernik, plastikinik, pappialanik akuutissanillu ulorianartunik akullit umiarsumik Danmarkiliaanneqartinneqarsimasut Tasiilami Materielgårdemi aqutsisoq Ulrik Gaffuri oqarpoq.
Ukiuni marlunni saliisoqassaaq
Tasiilamili eqqaavissuup naammaginartumik ingerlalernissaanut suliassat suli annertupput.
Ulrik Gaffuri naapertorlugu suli ukiut marluk ingerlareerpata eqqakkat takussaasut tamarmik peerneqarumaarput.
Eqqakkammi naliginnaasut saniatigut aamma bilitoqqaniit saviminikorpassuaqarpoq, immikkoortiteriarlugit Danmarkimi tuniniaqqinneqarsinnaasunik.
- Sulili ilisimangeqanngilaq qaqugorpiaq naammassineqassanersut, avatangiisinummi mingutsitsinnginnissaat anguniarlugu immikkoortiteqqissaarneqassasut, aqutsisoq oqarpoq.
Eqqakkanut poortuussuaq 2 millioner koruuneqarsimavoq, taakkunanngalu Namminersorlutik Oqartussat suliniummut 750.000 koruuninik tapiissuteqarsimapput.