Tasiilami assinik katersugaasivimmi imeq sammillugu saqqummersitsineq

Tasiilap assinut katersugaasiviani FN-ip Imeq imermilluunniit amigaateqarneq pillugu titartaatitsilluni unammisitsinerani ajugaasut apriilip 14-iata tungaanut saqqummersinneqassapput. Titartagaq ajugaassutaasoq Italiameerpoq, Daniele Gasparisillu titartagaralugu, taannalu atsersimavaa ”Wasting water will kill the future”. Titartakkat 3.500-it akornanni pitsaanerpaatut taanna toqqarneqarsimavoq.
Allattoq Peter Troelsen, Simon Uldum
apriilip 09-at 2013 11:35

Silarsuarmi kikkut tamarmik ajoraluartumik imermik minguitsumik pissarsisinnaanngillat. Allaammi imermik minguitsumik pissarsisoqarsinnaannginnera pissutigalugu meeqqanik ullut tamaasa toqusoqartarpoq. Tamannalu pissutigalugu nunat siuttuisa ataatsimeersuarnerannut Rio +20-mut atatillugu siorna allagartarsualiornissamik unammisitsisoqarpoq. Ajugaasup pinnaattaassaraa 5.000 euro Italiamiorlu ajugaalluni.

Allagartarsuarmi ajugaassutaasumi, allaaserisap matuma qulaani takuneqarsinnaasumi, naalungiarsuk illuinnarsuummik imermik seqqalittaammik ummiuteqqaneqarpoq, ajugaasullu kingulissatta nunarsuatsinni imermik ajornartorsiulersinnaanerinik taamaasilluni takutitsiniarpoq.

Saqqummersitsineq Tasiilami apriilip 15-iani naammassineqarpat Nuummut ingerlateqqinneqassapput, Nuuk Imermi saqqummersinneqassallutik.

Allagartarsuarnik saqqummersitsineq Nunani Avannarlerni Piorsarsimassutsikkut Attaveqaat / Nordens Institut i Grønland suleqatigalugu ingerlanneqarpoq.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq