Tasiilami aalakoorluni biilertoq mianersuaalliorluni toqutsisutut unnerluutigineqartoq

Biilertartoq siorna Tasiilami arnamik mianersuaalliorluni toqutsisutut pasineqartoq februaarimi eqqartuunneqassaaq.
Angut siorna aalakoorluni biilimik ingerlatsinermini mianersuaalliorluni toqutsisimasutut pasineqarpoq. Assi © : Pressefoto/Rigspolitiet
januaarip 20-at 2020 16:58

Mianersuaalliorluni toqutsineq aalakoorlunilu biilimik ingerlatsineq.

Biilertartup Tasiilameersup siorna pisumut, arnap inuunerannik naleqartumut atatillugu unioqqutissimasai ilaatigut tamakkuupput.

Taanna pilersaarutit naapertorlugit Tasiilami februaarip ulluisa 24-anni eqqartuussivimmi sassartinneqassaaq. Tamanna Eqqartuussisoqarfiup Sermersuup saqqummersitaani allassimasoq, Sermitsiaq.ag allaaserisaqarpoq.

Nittartakkatigut nutaarsiassiisarfik naapertorlugu arnaq 50-it sinnerlugit ukioqarpoq.