Tasiilami 19-inik ukiullip toqutsisuunini nassuerutigaa
Tasiilami angutip 19-inik ukiullip ukiortaap ullaavani angummik 43-inik ukiulimmik toqutsisuunini ullumi nassuerutigaa. Tasiilami politiit pisortaat Kristian Síngertât tallimanngormalli pasilikkaminnik ullumi tigusarinninnertik pillugu ima oqarpoq.
- Oqaloqatigineranut tunngavigivarput aallaqqaammut nasaa toqutsivimmi nassaarineqarami, taavalu oqaloqatiginerani oqarami tallimanngormat unnuakkut nasani tammaasimallugu katersortarfimmi. Taama oqaluttuariarluni kilernini aamma takutillugu. Síngertât nassuiaavoq, nangillunilu.
- Qarlii aagasattut aamma nassaarigatsigit, kilerneranillu pisimassasoq imaaliallaannaq tunuartiinnarsinnaasimanagu. Inuusaasia annertunerusumik paasiniaaffigileratsigu iluatsissimavarput illumikkut, oqarpoq.
Angutip 19-inik ukiullip inuusaasia paasiniarneqarmat aamma anguteqatiminoortartuusoq paasineqarpoq. Angut misiarsimagaluarpoq, naggataagulli nassuersimalluni.
Nassuernerata siuninnguagut paasissutissaq pingaartoq politiinut (ullumi 09.01.06 ullo’qeqqalivissoq) nalunaarutigineqarpoq. Angutip illumit toqutsiffiusumit aninera ukiortaami takuneqarsimavoq.
- Oqaluttuukkakku toqutsivimminngaanniit anisimasoq plasticposinik marlunnik nassarluni, taava apereriataaraminga DVD-t pivigit , tillitakka? Suu. Taamaalilluni nammineq nassuerpoq toqutsisimalluni.
Toqutsisup nassuerneratigut toqutaasup, Ammassallup kommuneani atuarfeqarermut kultureqarnermullu pisortaasup Rolf Geislerip, inooqataa angut 35-inik ukiulik - toqutsisimasutut pasineqarluni ukiortaamili tigummigallagaasoq – erngerluni iperarneqarpoq. Angullu annaakkuummernermik qiasimasoq, Kristian Síngertât oqaluttuarpoq. Aamma oqarpoq toqutsisoq pasisaagaluartumut ilaqutaasoq.
- Toqutaasup inooqataa illorivaa, taakkulu nalunngilluarlugit, Tasiilami politiit pisortaat oqarpoq.
Angut 19-inik ukiulik toqutsisuunerminik nassueruteqartoq ullumi napparsimmavimmi aassiorneqarpoq toqutsiffimmut attuumassuteqarnera qulakkeerniarlugu. Qarlii Danmarkimut misissugassanngorlugit aamma nassiunneqarput.
Angut kingusinnerusukkut eqqartuussisumut sassartinneqassaaq sapaatip-akunnerini sisamani tigummigallagassanngortinneqassalluni.
