Tasiilameersut ilinniartitaanerat ilimagisamit ajunnginneruvoq
Ukioq manna Tasiilami inuusuttuaqqat meeqqat atuarfiannit naammassisut 43-uupput taakkunanngalu 28-t efterskolini, ilinniarnertuunngorniarfinni inuussutissarsiutitigullu ilinniartitaaffinni atualerniarlutik qinnuteqarlutik.
- Inatsisartunut ilaasortamut Akitsinnguaq Olsenimut Inuit Ataqatigiinneersumut Naalakkersuisunit akissuteqaammi tamanna takuneqarsinnaavoq.
Tasiilami inuusuttut ilinniartitaanermut periarfissaat pillugit § 36 tunngavigalugu taanna arlalinnik apeqquteqaateqarpoq.
Akissummi takuneqarsinnaavoq inuusuttuaqqat 28-t ilinniaqqinniarlutik qinnuteqartut tamarmik atuaqqinnissaminnut akuerineqarsimasut. Akissuteqaammilu erseqqissarneqarpoq inuusuttuaqqat suli amerlanerusut ilanngukkumaartut, tassami efterskolimiinnissamut qinnuteqarnissamut killissarititaq suli qaangiutinngimmat.
Akitsinnguaq Olsenimullu akissuteqaammi aamma malugineqarsinnaavoq inuusuttuaqqat ukioqatigiiaat ukiup siuliani meeqqat atuarfiannit naammassisut marloriaammik amerlassuseqarnerannut atatillugu atuarfimmi suliffimmik misiliiffissat pilersinneqarnissaannut aningaasanut inatsimmi immikkut aningaasaliissuteqartoqartoq. Ukioq manna inuusuttuaqqat inuussutissarsiuteqarfinni inissaqanngitsut suliffimmik misiliinissaannut 7 millionit koruunit aappaagulu 13 millionit koruunit immikkoortinneqarput.
Tamatumunnga peqatigitillugu Nuummi, Sisimiuni Ilulissanilu maannakkumiit 2011-p naanissaata tungaanut ilinniartunut inissianik sanaartornissamut immikkut aningaasaliisoqartoq Naalakkersuisut akissutaanni takuneqarsinnaavoq.
