Taseralimmi mitaartunik unammisitsineq
Ukiualunngortuni Sisimiuni kulturikkut illorsuarmi Taseralimmi mitaartunik unammisitsisarneq ingerlanneqartarpoq. Tamanna pisarpoq juullikkut naggataarlugit, Kunngit Pingajuanni, 6. januar. Avannaani juulleriilaarnerani aallartittartut, Sisimiuni ukiorpassuarni Kunngit Pingasuni taamaallaat mitaarneq atorneqartarsimavoq.
januaarip 07-at 2014 13:01
Unammisitsinermi peqatigiiffiit assigiinngitsut suleqatigineqartarput, ukioq mannalu erinarsoqatigiit Sikkersut suleqatigalugit dommereralugillu mitaartunik unammisitsineq ingerlanneqarpoq. Aliikkusersuillaqqeqisoq Otto-Mika Villumsen illartitseqaluni mitaartunik aqutsisuuvoq.
Naak ukioq manna siullerpaamik iserneq akeqalaaraluartoq (meeqqat 20 kr., inersimasut 40 kr.), Taseraliup inersua ulikkaangajavissimavoq. Mitaartut 30-t sinnerlugit peqataapput, akunnerullu ataatsip ingerlanerani, tamarmik takutereersut, ajugaasoq, tulliuttoq pingajunngortorlu nassaarineqarput. Mitaartut aqqi pisarneq malillugu ilisimaneqanngillat.
