Taseralik matorataannaavoq
Taseralimmi aningaasaqarniarneq ilungersunartumik inissisimavoq, isertartut amerlanerulinngippata Taseralimmi filmertarfik sutorniarftarfillu Café matusariaqassapput.
Filmerfik sutorniartarfillu 200.000 koruuninik amigartooruteqarput, tamannalu akuerineqarsinnaanngilaq. Qeqqata Kommunia aamma Taseralik taama isumaqarput.
Qeqqata Kommunia kulturikkut illorsuarmut Taseralimmut ukiumut 3,5 millionit koruuninik tapiissuteqartarpoq.
Kulturikkut illorsuup atorneqartarneranut, nutaanillu isumassarsiortoqarnissamut, atuisartut isumaannik tusarniaalluni pisortaaneq Arnajaraq Støvlebæk sapaatip akunnerani kingullermi ataatsimiigiaqqusivoq.
Ataatsimiinnermi inuit qulingiluat kisimik takkupput, ataatsimiinnerullu taamaatinnarneqarnissaa Taseralimmit aalajangiunneqarluni.
Kisianni tassa susoqartariaqarpoq. Kulturikkut illorsuup aningaasatigut inissisimanera ilungersunarpoq. Illorsuup ingerlanneqarneranut, akissarsianut, sulisunullu aningaasarsiaqartunut taamaallaat akissaqartoqarpoq.
Sisimiormiut kulturikkut illorsuarmik peqarniarunik atorluarniartariaqarpaat, pisortaaneq oqarpoq, taassuma ernummatigaa, Sisimiuni neriartarfiit imerniartarfiillu assigalugit Taseraliup matunissaa.
Amigartooruteqarluta ingerlaannarsinnaanngilagut, tamanna kikkut tamarmik paasisinnaavaat, Arnajaraq Støvlbæk oqarpoq.
Taseraliup pisortaanera tunniutiinnarumanngilaq. Kulturikkut illorsuup Taseraliup siunissaa pillugu Sisimiuni innuttaasunik ataatsimiititsiniarpoq, tamannalu pissaaq pingasunngornermi marsip ulluisa qulingiluaanni. Pisortaanerup neriuutigaa ataatsimiinneq angusaqarfiulluartumik oqalliffiujumaartoq.