Tartupalummi silasiorfiliornialerput

Tartupaluup Canandamiunit Danskinillu pigiumaneqarnerat qaangiutilerunarpoq. Danskit Canada-miullu suleqatigiilutik silasiorfimmik Tartupalummi sanaartornialerput, taama aviisi Polarfronten allappoq. Silasiorfiliornissamut suleqatigiinneq iluatsissinnaasimavoq, Danmark-imi Danmarks Tekniske Universitet-imi DTU-mi proffiisorip Preben Gudmands-ip Canada-milu Toronto-mi Universitiitimeersup Kent Moore-p suleqatigiinnerisigut. Tartupalummi silasiorfiliornermi paasiniarneqarpoq, Kalaallit nunaata Canada-illu akornanniittumi, Nares stræde-p avannaatungaata paavatigoortoq siku, sikuiuitsoq avannarlermiit ingerlaartoq sooq ukiukkut sikuertarnersoq aasakkuunngitsoq. Silasiorfik sananeqarpat, Canada-miut atortut ikkussuunneqarnerat aningaasalersorneqarnerallu isumagissavaat, Danskit ilisimasatik Tartupalummilu ilisimaneqartariaqartut isumagissallugit. Tartupaluup eqqaani sikup ingerlaannera ukiuni kingullerni 15-ini qaammataasakkut malinnaaffigineqarsimavoq. Tartupaluup eqqaa nunarsuarmi tamarmi tininnerpaasarlunilu ulinnerpaasarpoq. Silasiorfiliorniarneq pillugu suliaq maannakkut Danmark-imi nunanut allanut ministerieqarfimmi suliarineqarpoq, kingornalu Canada-miut nunanut allanut ministereqarfiani akuerineqartussatut suliarineqassalluni.