Tartupaluliartoqassanngilaq!
Tartupalummukartoqassanngilaq!
Canadamiu ilisimatooq qeqertami oqallisigineqaqisumi silasiorfiliorusuttoq Kent Moore taama nalunaaruteqarpoq.
Kent Moorep Tartupalummi silaannaap nillissussaa, naqitsinertuffiit naqitsiniisaffiillu uuttortarusuppai, silallu pissusai misissorusullugit. Aallarnissaali qanillilluinnartorlu Canadami nunanut allanut ministereqarfimmiit Tartupalummukarnissaannut itigartitsipput.
Nunavumi naalakkersuisut Kent Moorep Tartupalummukarnissaa akuerisimavaat. Akuersissulli taanna Canadami oqartussanit marlunngormat allanngortinneqarpoq – Kent Moorep Tartupaluliarluni aallarfissaa ulloq eqqorlugu, Canadami nutaarsiassaqartitsivik Can West Global allaatiginnippoq.
Canadami nunanut allanut ministereqarfik paasissutissanik amerlanerusunik perusuppoq Kent Moorellu qinnuteqaataanik itigartitsinermi siunnersuutigaa danskit ilisimatuut ilagalugit Kent Moore Tartupalummi misissuisasoq.
- Danskimik ilisimatuumik suleqatissarsiornissaq kingusippallaaqimmat Tartupaluup kujataata kitaatungaaniittumut qeqertamut Cape Josephimik atilimmi silasiorfimmik ikkussuiartuinnassaanga, Kent Moore taama oqaannarsimavoq.
