Tarnip pissusaanik ilisimasallit atorfinitsinniarneqassapput

Tarnip pissusaanik ilisimasalinnik kommuniusimasuni atorfinitsitsiniarneq siornatigut ajornakusoorsimavoq, Qaasuitsullu Kommuniani suli taamaalluni.

Aasianni kingullermi atorfilik sivikitsuinnarmik sulereerluni soraarpoq.

Tarnip pissusaanik ilisimasalimmik atorfinittoqarnissaa anguniarlugu innuttaasut ilaat, Tittu Nielsen Johansen, nunaqqatiminik inunnik 1000-it sinnerlugit atsiortitsivoq.

Tarnilli pissusaanik ilisimasallit sisamat atorfinitsinneqarsinnaanissaat kommunip maanna neriuutigaa. Kommunimi innuttaasut 17.000-it sinnillit taamaaliornikkut tarnip pissusaanik ilisimasalinnit sullinneqarsinnaalissapput.

Illoqarfiit katillugit arfineq-pingasuupput nunaqarfiillu 31-ullutik.

Sullissisut Ilulissani qitiusumik allaffeqassapput, atorfillit attanneqarnissaat neriuutigineqarluni.

- Ataatsimuulerunik siunnersueqatigiissinnaassapput, isumaginninnermut pisortaq Magga Fencker oqarpoq. Siornatigut atorfinitsiniarnerigaluit iluatsissimanngitsut taassuma aamma oqaatigaa.

- Atorfiit inuttassarsiuunneqartut maanna oqaasertaliuunneqaleruttorput, sapaatillu-akunneri marluk pingasulluunniit ingerlanerini atorfinitsitsisinnaanissarput naatsorsuutigaarput, isumaginninnermut pisortaq oqarpoq.

Tarnip pissusaanik ilisimasalimmik nunatsinni atorfissaqartitsisut qassiunerat ilisimaneqanngilaq. Dronning Ingridip Napparsimmavissuata sinerissami peqqinnissaqarfiit innersuussutigai.

Aasianni, Kangaatsiami Qeqertarsuarmi, Qasigiannguanilu peqqissaaveqarfiit tarnip pissusaanik ilisimasalinnik qassinik pisariaqartitsinersut ilisimanngilaat.

Peqqissaasut siuttuat Inuuti Fleischer oqarpoq tarnip pissusaanik ilisimasalik pillugu Aasiaat siornatigut suleqatigineqartoq, sivikitsuinnarmilli atorfeqarsimanerarlugu.

Tarnilli pissusaanik ilisimasalimmik atorfissaqartitsisoqartoq aamma oqaatigaa:

-Oqaloqatigiinneit nuit tamatta iluaqutigisarpavut, kisianni eqqarsartaatsimikkut nappaateqartut maani peqqissaasoqarput. Apeqqutaavoq nappaat sorleq inuup atungarineraa, kisianni tarnip pissusaanik ilisimasallit arlalinnit atorluarneqarsinnaapput.