Tarnip pissusaanik ilisimasalik: Meeraq qajassuulluinnartariaqarpoq
Maniitsumi meeqqamik qulinik qaammatilimmik pinnissimanertut, meeqqap avatangiisaaniit peerteriataarnissaa, Inger Thormann-ip inassutiginngeqaa.
- Meeqqap avatangiisiminit nusunneqannginnissaa pingaarnerpaavoq. Paasisakka naapertorlugit meeraq qulinik qaammateqarpoq, taavalu misigissutsimigut allanut attaveqalereersimassalluni, taakkununngalu attaveqarneq paarisariaqarpoq. Taama qanimut attaveqarneq paaqqutarinnittuniit annivimmut asattuarnerpaamik nuunneqartariaqarpoq, Inger Thormann oqarpoq. Taassuma erseqqissarpaa, meeqqamik annivimmut nuussineq imaaliallaannagassaanngimmat, meeraq poortukkatut isigisassaanngimmat.
- Meeraq ikiorneqartariaqarpoq, meeqqallu susoqalernersoq paasiartuaartariaqarpaa. Inger Thormann, meeqqat sumiginnagaasimasut angerlarsimaffianni Skodsborg Observationshjem-imi tarnip pissusaanik immikkut ilisimasalik erseqqissaavoq. Meeqqat angerlarsimaffiat taanna meeqqanit ukioqanngitsuniit arfinilinnut ukiulinnit 20-it najorneqarpoq, tassanilu arnarsiassaminit sapaatit akunnerisa pingasut ingerlanerini arlaleriaqaluni pulaarneqartarpoq.
- Tassungalu atatillugu meeraq oqaluttuuttarparput, “tassa aana taamaallutik najugaqarfigiligassat, kisianni uatsi, sulimi ilisarisimanngilat”. Tassalu taamaalilluta meeqqap angajoqqaarsiassaminik ilisarisimannikkiartulernissaanut ikiortarparput. Meeqqap arnarsiassani ima toqqissisimaffigitigilertarpaa, allaat naggataatigut tulaaviginissaa qinertarlugu, meeqqammi susoqalernersoq paasisarpaa. Inger Thormann oqarpoq.
Taamaaliornikkut meeqqap meeqqat angerlarsimaffianniit aniartuaarnissaa iluatsittarpoq, taamaalillunilu meeqqap inunngoqqaarnermini asanniffigisaminik eqqaamanninnissaanut aamma ikiorneqartartoq, tarnip pissusaanik ilisimasalik nassuiaavoq.
- Tassa tipit meeqqap sungiusimasani pinngussanilu nassassavai illuanilu nutaanik pinnguartaarluni, taamaalillunilu inuuneq nutaaq misgalugu. Meerarli illuanik avatangiisitoqqaminit peertinneqariataaruni inuunermi sinneranut misillertinneqassasoq Inger Thormann isumaqarpoq.
- Meeraq avatangiisiminit pertinneqariataaruni, soorlu sorsunnermi, allamut nooriataarnermi imaluunniit ajunaarnersuaqartillugu taamaattoqartartoq, tassa peqqarniitsumik allanngortoqartillugu, taava avissaartinneqassaaq, inuunermi sinnerani qaangersinnaanngisaminik, tarnip pissusaanik ilisimasalik Inger Thormann Charlotte Guldborg peqatigalugu atuakkamik ”asattuartumik inissiineq”-mik qulequtalimmik atuakkiorsimasoq oqarpoq.
