Tarnip pissusaanik ilisimasalik: Ikiuigasuartarnissaq pisariaqarpoq

- Ajortumik pisoqartillugu eqqugaasut tuparujussuaqqasarput, saniatigullu misigissutsikkut sakkortuumik qisuariarsinnaasarlutik. Tassanilu pingaaruteqarluinnarpoq ikiuigasuartussat piaarnerpaamik sassarnissaat eqqugaasullu avatangiisinullusooq illersorlugit, oqaloqatigisakkatullu atorneqarnissaat, Niels Peter Agger sineriammi inunnik isumaginnittoqarfinni ikiuigasuarnissamik pikkorissaaqataasoq taama oqarpoq.

- Eqqugaasimasut misigisaminnik eqqartuiuarnissartik assut pisariaqartittarpaat, aammalu pingaaruteqarluinnarpoq eqqartuiarnissaat amma tusarnaarneqarnissaat, tassani tatiginninnermik tapersersorneqarnermillu misigitinneqarnissaat pingaaruteqarluinnarmat.

- Ungasinnerusoq eqqarsaatigalugu pingaaruteqarluinnarpoq, misigisap ammasumik eqqartorneqartarnissaa, tassami ajoraluartumik takussaasarpoq misigisimasat tarnikkut nakorsarneqarsimatinnagit uninngatiinnarsimagaanni napparsimassutigilerlugillu pisimasut issuarlugit ajortuliortoqaqqissinnaasarami.” Niels Peter Agger naggasiivoq.

Ukioq 2007 aallarnerfigalugu illoqarfinni tamani, taamaallaat Qaqortoq, Narsaq, Tasiilaq Illoqqortoormiullu minillugit ikuinasuarnissamik Namminersornerullutik Oqartussanit pikkorissaasoqarpoq, pilersaarutaavorlu siunissami qaninnermi illoqarfiit sinneruttut ilanngunneqarnissaat.