Tarnip nakorsaasa inatsisitigut illersorneqarnissaat oqaluuserineqanngilaq
Nunatsinni katsorsaasartut psykoterapeutit, coach-it allatullu ilinniarsimasut amerliartuinnartillugit tarnip pissusiinik nakorsat illersorneqarnissaat pillugu inatsisiliortoqarnissaa pisariaqalernerarlugu, inatsisartunut ilaasortaq Naaja H. Nathanielsen, Inuit Ataqatigiit, siunnersuuteqarpoq. Aalajangiiffigisassatulli siunnersuut inatsisartut sapaatip-akunnerani kingullermi itigartippaat.
Kalaallit Danmarkimi psykologinut inatsimmit 1994-imeersumit illersorneqareersut, Peqqissutsimut Naalakkersuisoq Agathe Fontain oqarpoq.
- Ullumikkut illersorneqarput amerlanerit Qallunaat Nunaanni ilinniarsimasutut autorisationimik tunisissimasut. Qallunaat autorisarionsloviat tunngavigalugu illersorneqarput.
Agathe Fontainip aamma paasisinnaalluarpaa tarnip pissusiinik nakorsat pillugit nunatsinni inatsisilioqqusisut, innuttaasut ataasiakkaat katsorsarneqarnerminni toqqissisimasinnaanerannik qulakkeerisussaammat. Inuillu tarninginik sammisaqarniaraanni immikkut ilisimasaqaqqaarnissamik oqariartuutit pingaaruteqarnerarpai.
- Taanna soqutigisorujussuuarput. Aamma nalunaarusioreernerup misissuqqissaarnerullu kingorna taanna nunatsinnut nuussinnaanerlugu misissussavarput, kisianniuna ilisimanngikkipput ullumikkoqqissaaq qanoq akeqarumaarnersoq. Taamaammat-una ilisimanngisatsinnik akuersinissamut innersuussinissarput perusunngikkipput.
Agathe Fontainip naatsorsuutigaa, Peqqissutsimut Naalakkersuisoqarfimmit misissueqqissaarinermik Inatsisartut upernaakkut 2010-mi ataatsimiinneranni saqqummiiumaarlutik.
Siunnersuuteqartoq Naaja H. Nathanielsen kinguartitsinermut paasinnippoq, oqarluni oqartussaaffiit assigiinngitsut qulaajaqqaarnissaat pisariaqartoq.