Tarnimikkut innarluutillit isumagineqarluarput
Andreas Olsenip atuartitaanermut pisortaqarfimmi immikkoortortamut pisortap Ilulissani Specialcenteri Atuarfik Mathias Storchimut atasutut nalilerpaa, naak immikkut atuarfittut Specialcenterimik taaneqarluni ingerlagaluartoq. Aamma Andreas Olsenip oqaatigaa atuarfimmut Namminersornerullutik Oqartussat toqqaannartumik aningaasaliissuteqartartoq.
”tassa nalinginnaasumik nunarput tamaat eqqarsaatigalugu immikkut annertusisamik atuartut atuarfiit ataanni inissisimasarput taava soorunalimi eqqarsaatigineqarsinnaavoq taava soorlu immikkut annertusisamik atuartut tamaaviisa immikkut aamma atuarfiliussavaguut? Isumaqarpunga taanna piviusunngussappat soorunalimi eqqarsaatigilluaqqaartariaqartoq.”
Specialcenteri sineriammi atuartitsinernut sanilliullugu pitsaanerpaajunersoq oqaaseqarfigisinnaannginnerarpaa.
Ullumikkut tarnimikkut innarluutillit 20-nik ukioqalereeraangata annerusumik ilinniaqqinnissamut neqeroorfigineqarnatik nakkusserusaaginnartussatut inissisimalertartut pinngitsoortinniarlugit, Specialcenterimi sulisut atuarfitsik immikkut tarnimikkut innarluutilinnut atuarfinngortikkusuppaat.
Imaasiallaannaq anguneqarsinnaannginneranut atatillugu Andreas Olsen aperaarput tamatumunnga peqqutaanersoq politikerit sinaakkusiisussaraluit suliaminnik isumaginninngitsoorsimanerat, imalu akivoq:
”soorlu una Specialcenteri eqqartorneqartoq tassani politikerit sinaakkutissanik pilersitsinikuupput, kisianni soorlu aatsaannguaq oqartunga atuarunnaareeraangata atuarfimminngaaniit anigaangata taava qanoq annertunerusumik sammineqarsinnaavoq taavalu uagut tassani meeqqat atuarfianni sulisut suleqatigalugit anguniarsinnaavarput.”
Andreas Olsen aamma isumaqarpoq peqqussutit nalunaarutillu malillugit ullumikkut tarnimikkut innarluutillit atuarfitsialammi isumagineqarluartut.
