Tapiissutit peerpata kalaallit Aalborgimiittut naapiffeerutissapput
Taakkua naalagaaffiup aningaasaatigimmagit kommunit aningaasaataannut nuunneqartussat, soorunami neriuutigisimagaluarparput Aalborgip kommunia, ukiut ingerlaneranni annertoorujussuarmik kalaallinut suliniuteqartoq, Perput aallartinniarlugu peqataatinneqassasoq. Pingaartumik pissutigalugu siorna neqeroorutip aappaa annaasimagatsigu tassaasoq kalaallit arnat najugaqatigiiffissaat.
Taamaattumik assut ilungersunarpoq Kalaallit Illuutaat ukioq manna suliniummik suli ataatsimik annaasaqarmat taamaalillutalu kalaaleq sulisoq ataaseq soraarsittariaqarlugu.
- Ileqqaarniutit Aalborgimi kalaallinut atugarliornerusunut qanoq kinguneqassanersut Jan Thrysøe aperineqarami ima akivoq:
- Uanga isumaga naapertorlugu kalaallinullu Danmarkimiittunut ilisimasaqarnera eqqarsaatigalugu nuannariinnarlugu oqartoqarsinnaavoq "issiavimmut uteqqinneqartoq", tassalu atornerluisutut atuinermut.
Maanna ukiuni arfineq-marlunni avatangiisit atornerluiffiunngitsut neqeroorutigisinnaasarsimavavut, maannali tamakku unitsinneqarlutik. Tamatumalu kingunerissavaa inuit, nalunngisatsisut kalaallinik allanik peqateqarusuttut maanna allamukartalissammata kalaaleqarfiusunut. Kalaallillu allat ajoraluartumik tassaapput atornerluisunik avatangiiseqartut, tassami tamakkunani katersuuttoqartarmat.
Tamatumuuna Perpumik atuisut amerlaqisut nakkaallattussaapput ukiut arfineq-marluk ilungersuutigisimasatsitut inuttut atugaasa qaffassarneranninngarnit.
Taamaattumik uggornarpoq 650.000 kr.-innguit suliassatut pilersaarutip nangeqqinnissaanut atorfissaqartinneqartut nassaarineqarsinnaanngimmata, Kalaallit Illuutaanni pisortaq Jan Thrysøe taama oqarpoq.
Ilaqutariinnut suliassaqartitsinermullu aqutsisoqarfimmi rådmandiusoq Maibritt Iversen Radioaviisimut oqarpoq, kommunip ileqqaarutissatut malunniuttut pissutigalugit Aalborgimi kalaallinut atugarliornerusunut suliassatut pilersaarutinut naalagaaffiup aningaaliissutai allatut ajornartumik atorsinnaanngikkai.
