Tapiissutit annaanngikkaluarlugit nunatta pisuussutaanut piginnittuusariaqarpugut

Ataatsimoortumik tapiissutit annaanngikkaluarlugit nunatta pisuussutaanut piginnittussaalernissarput pisariaqartoq, Namminersorneq pillugu Ataatsimiisitaliarsuarmi ilaasortat taama oqarput. Taamalu tamanna danskit paasinngippassuk nunatta Danmarkillu attaveqatigiinneranut ineriartuutaanngitsumik ataqqinanngitsumillu ajoqutaalersinnaasoq erseqqissaatigaat. Danskit ilaasortat konservativineersut Dansk Fokepartiimeersullu qaninngoorniannginnerujussuat taama kinguneqarsinnaasoq ataatsimiisitaliarsuarmi ilaasortap, Kuupik Kleist-ip taama nalilerpaa. Taamaassappat ingerlariaqqinnissamut periarfissat marluupput. Siulleq tassavoq, nikallorluta oqarsinnaasugut, namminersornerulersimanerput ukiuni ima amerlatigisuni nangeqqiinnartariaqarparput. Imaluunniit uagut nammineerluta Naalagaaffeqatigiinniit aninissarput angunialersinnaavarput. Periarfissarlu siulleq soqutiginanngilaq, tassami kalaallit qamannga kissaatigaat inuunerminni ingerlariaqqinnissartik, Kuupik Kleist oqarpoq