Taperneqarnertik iluarisimaarpaa
-Isumaqarpugut tapiissutit inissinnerat iluaqutaassasoq, neriuppugullu ukioq 2008-mi savaaqqanik toqoraanissamut tunngavissaqalerluta, Neqi A/S-imi pisortaq Lars Møller Sørensen 3,2 millioni koruuninik Neqi a/s-ip taperneqarneranut atatillugu oqarpoq. Taanna 2008-mi savaaqqanik toqoraaneq iluatitsumik naammassissappat nuannaassaqaaq.
- Savaaqqanik toqoraanerup kingorna savaatillit Namminersornerullutillu Oqartussat naapeqqittariaqassavagut siunissami qanoq iliortoqarnissaa eqqarsaatigalugu, Lars Møller Sørensen oqarpoq, erseqqissaatigalugu KNI a/s
Neqi a/s-imut atatillugu amigartooruteqarusunngitsoq.
- Siunissami toqoraaveqaannassappat arlaatigut aningaasaliisoqartariaqassaaq, Lars Møller Sørensen erseqqissaavoq.
Neqi a/s-imut tapiissuteqarnermut atatillugu Aningaasaqarnermut Ataatsimiititaliap siulittaasuata Augusta Sallingip erseqqissaatigaa siunissami aningaasaliisoqaqqinnissaa neriuutigineqassanngitsoq, tamannalu Lars Møller Sørensenip oqaaseqarfigerusunngilaa, politikkerit nammineq isummersinnaanissaat akornutissaqartinnginnamiuk.
Neqi a/s-ip amigartooruteqartarnera qanoq mumisinneqarsinnaanersoq Lars Møller Sørensen aperineqarami ima akivoq.
-Ajornanngitsuarakasimmik sinneqartoorsinnaangaluarutta qangali iliuuseqarsimassagaluarpugut, kisianni sinneqartoortalissagutta savaaqqat amerlanerit toqorarsinnaasariaqarpagut tamannalu siunissami pisinnaalernissaa neriuutigaarput imaluunniit toqoraaviit nutarterneqarpata Neqi a/s imminut kaaviaartissinnaalissaaq, Lars Møller Sørensen Neqi a/s-imi pisortaq oqarpoq.