Tanbreezimi pisortaaninngorlaap kujataani pisiarinninneq aatsitassarsiornerullu sukkatsikkiartornera oqaluttuarigai

Tanbreez Mining Greenlandip pisortartaavata Thomas “Tyt” Mogensenip kujataani Killavaat Alannguanni aatsitassarsiornermut pilersaarutaa ersarippoq. 

Ingerlatseqatigiiffiup aatsitassarsiorfik aappaagu sanaartulissavaa, aatsitassanillu pingaaruteqarluinnartunik soorlu eudialytenik immaqalu feldspatinik 2029-mi piiaasinnaanngoriissalluni.  

Misileraaffiit siulliit qanittukkunni aamma nappaanersiorneqarput. 

- Misissuilluta qillereqattaarpugut, nunap qanoq inneranik misissuivugut, immap itissusaanik misissuivugut unalu aatsitassarsiorfik tamaat pilersaarusiorlugu, Thomas “Tyt” Mogensen oqarpoq.  

- Ilusilersuinerup matuma ilagaa, aatsitassanut piiakkatsinnut misileraaffiliussaagut tamannaana pillugu aamma nappaanersiortoqartoq.

Australiamiut Amerikamiullu ingerlatseqatigiiffiata, Tanbreez Mining Greenlandimik piginnittup, Critical Metal Corpip kujataani suliffeqarfiup 60 North Greenlandip 70 procentia maajimi pisiaraa.

- 60 North nunatta kujataani ukiuni 30-nit 35-nut suliaqarput. Suliniutinik, misissueqqissaarnermi suliniutinik amerlasuunik suliaqarsimavoq, aatsitassarsiorfiillu ingerlatseqatigiiffiillu misissuisut allarpassuit ikiorsimallugit, taamaammat ingerlatseqatigiiffimmik pisinerput uagut periusissatsinnut pingaaruteqartut ilagaat, Thomas “Tyt” Mogensen oqarpoq. 

Sulisussanik pisariaqartitsisut

Tanbreezimi pisortap nutaap ingerlatseqatigiiffiup sanaartornermi suliaqarnerup nalaani 250-init 400-nut sulisoqarnissaa oqaatigaa.

-  Piffissap ingerlanerani nikeralaartassaaq. Aasaanerani pisariaqartitsinerussagunarpugut, ukiuuneranilu ikinnerusunik, aamma ilaassinnaavoq qaammatialunni silap qanoq innera pissutigalugu aamma sanaartunngiivittugut, Thomas “Tyt” Mogensen oqarpoq:

- Tunisassiorneq aallartikkutsigu aasaanerani aamma tunisassiornerusassaagut, taamaammat suliffissat 200-t 300-llu akornanniinnissaat naatsorsuutigaarput.

Taassumali sulisut ilaat nunanit allaneersuunissaat naatsorsuutigaa.

- Kalaallit Nunaanni aatsitassarsiornermi ingeniørit ujarassiuullu naammanngillat, taamaammat piffissap ilaani nunanit allanit sulisoqartariaqarpugut Thomas “Tyt” Mogensen oqarpoq: 

- Najukkamit sulisoqarusulluinnarpugut. Inunnik Kalaallit Nunaata kujataanut nuutsitserusuppugut. Kisianni kujataani mekanikerit sanasulluunniit tamarmik sulilersillutigit, inuit illuminnik biiliminnillu iluarsartuussititsinissamut sulisussaqarunnaarsikkunngilluinnarpagut.

Akoorutissanik atuinani sulineq

Misileraaffinni 60° Northip sanaartorlugit naammasaleruttugaani aatsitassanik aserorteriffeqassaaq.

- Aatsitassat qalipaat atorlugu aallaqqaammut immikkoorterneqartassapput, tamatuma kingorna aatsitassat magneteqartunik immikkoortiterisoqartassaaq, Thomas “Tyt” Mogensen oqarpoq: 

- Akoorutissanik atuinata magnetiinnarmik immikkoortiterissaagut, taamaammat mingutsitsisoqassanngiivippoq.

Ingerlatseqatigiiffiup Killavaat Alannguanni aatsitassat suaniinnersut paasiniarlugit arlalinnik misissuilerlutik ukiunilu arlalinni assigiionngisunik suliaqarsimallutik pisortap oqaatigaa:

- Atortorissaarutigut umiatsuillu aatsitassarsiorfiliortussat tikissinnaaneraat paasiniassagatsigu avatangiisinik misissuisoqareerlunilu kangerlummi itissutsit uuttortarneqareerput. Umiarsualiviliornissarput aamma misissuiffigaarput.

Tanbreez umiarsuarmik takornariartaat, Nuummi Issittumi Sakkutooqarfimmit sakkutuunut ineqarfiusimasoq pisiarereerpaa:

- Aatsitassarsiorfittavianik sanaartornerup aappaagu aallartinnissaa naatsorsuutigaarput. Umiarsuarmik takornariartaammik campitut atugassatsinnik aamma pisivugut. Taanna allanngorterlugu piareersarlugulu aallartipparput, Thomas “Tyt” Mogensen oqarpoq:

- Sukkasoorujussuarmik ingerlassaagut, pisortaq piffissaliussaq pillugu oqarpoq.