Tanbreez: Kalaallit Nunaat aatsitassarsiornikkut unammillersinnaanngilaq

Aatsitassarsiorniarnerlu iluamik ingerlallualissappat, naalakkersuisut allaffissornikkut pitsaanerusumik aaqqissuussisariaqartut oqaatigalugu.

- Kalaallit Nunaanni misigisarsimasakka aallaavigalugit aatsitassarsiorniarneq arriitsuaraararsuuvoq. Nunanut allanut sanilliutissagaanni unammillersinnaanngilaq. Uagut ukiuni marlunni aatsitassarsiornissatsinnut akuersissummik piniarluta utaqqivugut. Nunani allani qaammatit pingasut, arfineq-marlulluunniit akuersissummik piniarlutik utaqqisarput, taamaattumik nunanut allanut sanilliutissagaanni Kalaallit Nunaat unammillersinnaanngilaq. Piffissangaatsiaq aalajangiinermut atorneqartartoq nunammillersinnaajunnaarsitsivoq. Ingammik Kalaallit Nunaanni aatsitassarsiorniarnermi aningaasartuuterpassuit eqqarsaatigissagaanni. Geologi, Greg Barnes ippassaq uulia aatsitassarsiornerlu pillugit tusarniaasoqarmat oqarpoq.
 
Aamma oqarpoq allaffissornerujussaq iluamik Naalakkersuisut aaqqisuuteqqittariaqaraat.
 
- Nunarsuarmi aatsitassarsiorniarneq unammillernartorujussuuvoq, aamma aatsitassarsiorfiit aatsitassarsiornermik ingerlatsitseqatigiiffinnut pitsaasunut ingerlasarput. Taamaattumik naalakkersuinerup allaffissornerujussuat nutaaliaanerusumik aaqqissuunenqartariaqaraluarpoq. Aatsitassarsiorniarneq iluamik ingerlalissappat aaqqissuunneqartariaqarpoq, Greg Barnes oqarpoq.
 
Nuna Mineralsimi pisortaq Ole Christiasen aamma isumaqarpoq aatsitassasiornissamut allaffissornerujussuaq pisariaqanngitsoq.
 
Aatsitassarsiorneq uuliasiornerlu pillugu ippassaq tusarniaasoqarmat revisori Knud Østergaardip oqaatigaa maluginiarsimallugu aatsitassarsiornissamut isumaqatiginninniartartut tupaallaatigisaraat suleqatigiinninniarnermut piginnaasat annikippallaartarneri.

Nunatsinni allaffissorneq nunarsuarmi sukkanerpaat ilaanniippoq

 
Aatsitassanulli Naalakkersuisup Jens Erik Kirkegaardip Greg Barnes allaffissornerup arriippallaarneranik isornartorsiuinera isumaqatiginngilaa.
 
- Naalakkersuisutut suligaanni inuit ataasiakkaat oqariartuutaat tunngavigalugit aalajangersaasinnaanngilagut, kisiannili nalilersuinerit misissuinerillu siammasinnerusut uani nunat tamalaat misissuinermi takutippaat nunarput allaffissornikkut inatsisitigullu ingerlatsinermi silarsuarmi pitsaanerpaat ilaanniittoq. Nunallu immikkoortortaqarfiinut arlalinnut sanilliutissagutta sukkanerpaat ilaanniippugut. Taamaattumik nunatsinni periuserisarput ataatsimut isigalugu ajunngitsorujusssuuvoq, Jens Erik Kirkegaard oqarpoq.
 
Greg Barnesili isumaqarpoq allaffissorneq sukkanerusumik ingerlagaluarpat iluanaarnerusoqarsinnaagaluartoq.
 
- Aatsitassarsiorniarluta utaqqinerput ukiut marlunni pinnani, nalinginnaasumik qaammatini arfinilinni ingerlasimasuugaluarpat, massakkut aatsitassarsiorfinnik ingerlasoqassagaluarpoq. Taava aatsitassarsiorfiup ingerlarusaarnerani aningaasaliisussanik nassaartoqarsinnaagaluarpoq. Akuersissummik piniarluni ukiut marluk sinnerlugit utaqqigaanni aningaasaliisussanik nassaarniarnissaq ajornakusoortorujussuuvoq. Aatsitassarsiorfiit nunallu arlallit ilikkareerpaat, aatsitassarsiornerup ingerlaarnerani qaffariasaarnerit pisartut, taamaaliunngikkaannimi iluatsitsilluartoqarsinnaanngilaq, Greg Barnes oqarpoq.
 
Nunatsinni aatsitassarsiorniarluni allaffissornerit arriippallaarneri pissuutaallutik unammillersinnaanissaq London Miningimi attaveqarnermi pisortap Kaj Kleistip ernumaginngilaa.
 
- Soorunami uagut unissimassagaluarpugut takusinnaasimagaluarutsigu aningaasaliisussanik periarfissaqarnata. Kisianni taamaanngilaq, suut tamarmik piffissat atorlugit ingerlattariaqarpagut. Aammattaarlu ullormiit ullormut akuersissutit tunniunneqanngisaannarput. Taamaammat taannartaa uagut ernumassutiginngilarput. Neriuppugut aamma suli aningaasaliisussanik soqutiginnittunik nassaarsinnaassalluta, Kaj Kleist oqarpoq.