Tammaraluartoq uterpoq

Tuluit Nunaanni angut ukiuni tallimani tammaqqasoq uteriasaarmat eqqumiigineqarpoq. Angut taamani qajartorluni aallarsimavoq, ullumilu takkummat politiit tigusaralugu apersoraluarpaat, angulli pisimasunik eqqaamasaqarani oqarpoq.

John Darwin, 2002-mi marsimi tammaaneqalermat politiit qulimiguulinnik annanniutinillu ujaarigaluarpaat, naggataatigullumi Tuluit Nunaata avannaata kangiani paataata qajaatalu aappalaartup sinneri nassaaralugit, timaali nassaarinagu. John Darwinili maannakkut 57-inik ukiulik inuummareqaluni palersimallunilu Londonimi politeeqarfimmut arfininngormat imminut tunniuppoq. Angut oqaluttuarpoq aallaramili, tassanngalu ukiut marluk sioqqullugit pisimasut eqqaamanagit.

John Darwinip angutaa ernerilu marluk peroreersut takummaallutik nuannaaraluartut, Johnip atsaa nuannaanngilluinnarpoq, ilaquttani ukiuni tallimani isumaalutsissimammagit.

John Darwinip tammarnera tusagassiuutitigut eqqumiigineqaqaaq, minnerunngitsumik nuliata aningaasat Johnip inuuneranut sillimmasiussat qangali tigoreernikuummagit illortillu tuneriarlugu Panama City-mut nooqqammerluni. John Darwin imminut tunniutereeraluartoq tusagassiuutit pisimasoq soqutigiunnaanngilaat, minnerunngitsumik Johnip nuliatalu Panamami assingannik, juulimi 2006-imeersumik, aviisimut Daily Mailimut takkuttoqarsimammat.