Politi: Tammaaneqartup sumiissimasinnaaneranik takussutissanik nassaartoqarpoq

Tammaaneqartup arlaleriarluni ujaarineqartareersup sumiinneranik takussutissaasinnaasunik piaarinaatsoornikkut nassaartoqartoq, Qaqortumi politiit KNR-imut ilisimatitsipput. 

- Kamippaat illua Tasersuup sinaani timersortarfimmit 500 meterisut ungasitsigisumiittoq arpattartumit sapaatip akunnerata naanerani nassaarineqarpoq, kamippaallu illuata aappa nassaaqqaarfiup akiani nassaarineqarluni, Kujallermi politiini immikkoortortaqarfimmi aqutsisoq, Laila Fleischer, KNR-imut oqarpoq.

Tamatuma kingorna ujaasineq annikillisinneqarpoq, Tasersuarlu kisiat ujaasiffigineqalerluni.

Gudrun Sanimuínak arfininngornerup sapaatillu akornanni unnuami novembarit aqqaneq aappaani periarfeerunneqarpoq. Kingornalu politiit innuttaasullumi kajumissutsiminnik ujaasisarsimapput. 

18-inillu ukiullip ilaqutai maanna isumaqatigineqareersut ujaasineq pillugu paasissutissanik politiit nalunaaruteqarput. 

- Qaqortumi qatserisartut aqqartartutuaat Tasersuami, kamippaat nassaarineqarfiisa nalaanni, ujaasigaluarpoq nassaartoqarnanili. Ujaasineq maanna unitsinneqarallarpoq, Laila Fleischer ilisimatitsivoq. 

Qaqortumi politiit Issittumi Sakkutooqarfimmut ikioqqullutik saaffiginnissimapput, sakkutooqarfiullu pilersaarutit malillugit kujataani angalanissamut atatillugu aqqartartunik marlunnik sapaatiuppat ikiuussinnaallutik neriorsuisimasut Laila Fleischer oqarpoq. 

Gudrun Sanimuínap ujaarineqarneranut atatillugu innuttaasut kajumissutsimik ujaasillutik novembarip 23-ani aallartissimapput. Taakku ujaasinerup unitsinneqarallarsimaneranik maanna ilisimatinneqarsimalersut politiit ilisimatitsipput.

AAMMA ATUARUK 18-inik ukiullip Gudrunip sumiinneranut takussutissaqanngivittoq

AAMMA ATUARUK Mange mødt op for at lede efter Gudrun Sanimuínak