18-inik ukiullip Gudrunip sumiinneranut takussutissaqanngivittoq

18-inik ukiullip ujarneqarnerani Qaqortumi namminneq kajumissutsiminnik ikiuukkusuttut sisamanngornermi ujaaseqataapput. Iluatsitsinngillalli.

- Suli sumiissinnaaneranut takussutissarsinngilagut, Kujaani politiit aqutsisuat, Laila Fleischer pakatsinartumik nalunaaruteqarpoq.

Namminneq kajumissutsiminnik ikiuukkusuttut tallimanngornermi ualikkut ujarleqqinniaraluarput, anorilli sakkortuup pilersaarut taanna unitsippaa.

Issittumi Sakkutooqarfik Qaqortumi politiinut ikiuukkiartorluni sapaatip akunnerani siusinnerusukkut Qaqortumiippoq, 18-inilli ukiullip arnap, novembarip 12-iani kingullermik Rockhousemi Qaqortumi takuneqartup sumiissinnaaneranut takussutissarsinani.

- Paasissutissaatigut taama annikitsigitillugit suliap ingerlariaqqissinnaasut ajornartorsiungaatsiarpugut. Sapaatip akunnerata siuliani ujartuleratsiguli marluinnarnit saaffigineqarpugut, Laila Fleischer oqarpoq.

AAMMA ATUARUK Ujaasineq kinguneqanngitsoq - Qaqortormiut namminneq piumassutsiminnik ujaasilersut

Politiit suliami takunngitsuugaqarsimaqinagamik maannakkut misissoqqippaat.

Tamanna ilutigalugu Gudrunip sumiinneranik takunnissimasinnaasut tusagaqarsimasinnaasullu politiinut saaffiginneqquneqarput.

AAMMA ATUARUK Qulimiguullit, aqqartartut umiarsuillu Gudrun ujaarileruttoraat

Aammali Laila Fleischerip inuusuttoq tammaaneqartoq arlaanni toqqorsimaguni ilisimatitsinissaanik qinnuigaa.

- Kanngusuuteqaraluarluti allamilluunniit peqquteqaraluaruit paaqqinniffinnut politiinulluunniit sianerit. Arlaanniikkuit ajornak nalunaarutigalugu sianilaarit, Laila Fleischer oqarpoq, politiillu Gudrun Sanimuínap tammarneranut atatillugu arlaannik ajortoqarsimaneranik paasissutissaateqannginnertik erseqqisaatigaa.

- Kisianni amerlasuut ernumapput. Ilaquttat ikinngutillu kisimik ernumanngillat, Qaqortumi innuttaasut aamma ernumapput. Tamanna namminneq kajumissutsiminnik ujaasisoqarneratigut takuneqarsinnaavoq, Kujaani politiinit, Laila Fleischer KNR-imut oqarpoq.

Kujataani Politiit oqarasuaammut 701122-imut saaffigineqarsinnaapput. Imaluunniit politiit pingaartuutitaat oqarasuaammut 701448-imut attavigineqarsinnaavoq.