Tamat oqartussaaqataanerannut saassussineruvoq

Naalakkersuisut siulittaasuannik Hans Enoksenimik, arfininngormat Nuummi ilisisunik peqataareerluni aqqusinermi ingerlasumut, angummit 20-nik ukiulimmit aalakoortumit oqaatsitigut sukangasaarfigineqarlunilu nukersorfigineqarluni saassunneqarnera tamat oqartussaaqataanerannut saassussinneruvoq, Demokraatit siulittaasuat Jens B. Frederiksen ullumi allappoq.
Allattoq Najaaraq Egede
februaarip 23-at 2009 06:35

- Neriuppugut taamatut pissusilersornermut akerliulluinnarnerput eqqartuussiveqarnermik ingerlatsiviup takutissagaa. Naalakkersuisunut siulittaasuugaanni sunilluunniit naammattuugaqarsinnaaneq naatsorsuutigisariaqarpoq. Kisiannili timikkut saassunneqarnissamik sioorasaarneqarnermillu pisoqartillugu pinngitsoorata killiliisinnaasariaqarpugut. Taamaattumik taamatut nuanninngitsumik pisoqartillugu, soorlu Hans Enoksenimut pisup assinganik pisoqartillugu akerliulluinnartariaqarpugut, Demokraatit siulittaasuat allappoq.

Hans Enoksen isumaqatiginngittaqaarput, kisianni taama isumaqarneq saassussinermik kinguneqartariaqanngilaq. Hans Enoksen kikkut tamat oqartussaaqataanerat tunngavigalugu qinigaavoq, taamaattumik akiorniarutsigu taamaallaat demokrati atorlugu akiussavarput, Jens B. Frederiksen, Hans Enoksenimik ilaqutaanillu misiginneqatiginnittoq, allappoq.

- Taamatut pinninneq kimulluunniit tutsinneqartariaqanngilaq. Pisimasumut oqaaseqaatini taama naggaserpaa.

Angut inuusuttoq Hans Enoksenimik saassussisoq ippassaq ulluni 16-ini tigummigallagassanngortitaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq