Tamat oqartussaanerat sanngiillisimasoq
- Kommunalbestyrelset ikilisinneqarnerisigut innuttaasut oqartussaaqataanerat sanngiilliallatsinneqarpoq, Borgmester Asii Chemnitz Narup oqarpoq siunnersuisooqatigiinnillu nunaqarfinni aqutsisunut assigusunik illoqarfinni pilersitsisinnaaneq siunnersuutigalugu.
- Nunaqarfinni aqutsisoqarpugut taakkua isumannaarneqarput, kisianni illoqarfinni innuttaasugut illoqarfinni innuttaasugut oqartussaaqataanerata sanngiilliallatsinneqarsimanera pitsaasuunngilaq, Kommuneqarfik Sermersuumi borgmesteri Asii Chemnitz Narup, kommunerujussuit atuutilernerisigut kommunalbestyrelset ikilisinneqarmata innuttaasut oqartussaaqataanerisa sanngiillisinneqarnerat pillugu taama oqarpoq.
Naalakkersuisut aamma borgmesterit kommunit pillugit isumaqasioqatigiinnerminni najukkami oqartussaaqataanerup sanngiillisimanera pillugu ersarissumik oqariartuuteqarput. Kommunerujussuillu atuutilernerisigut kommunalbestyrelset ikilisinneqarneri innuttaasut oqartussaaqataanerannut unammillernartuusoq nassuerutigaat.
- Misigisimasoqarpoq innuttaaqataasut naliginnarmik siornatigut ilaa kommunalbestyrelseni ilaasortanik ullut tamaasa naapitsisinnaanerigaluat allanngortoq, aamma tamanna eqqumiiginanngilaq kommunit sisamaannanngormata, naalakkersuisut siulittaasuat Kuupik Kleist oqarpoq, namminnerlu tamat oqartussaaqataanerat qulakkeerniarlugu aaqqiissutissanik imaalitsiaannaq tikkuussisinnaannginnerarpoq, nutaamilli eqqarsartoqartariaqarsoraa.
- Taamaammat nutaamik eqqarsartoqartariaqarpoq, aamma oqaatigineqartariaqarsoriva, massakkut kommuninit, KANUKOKA-mit, Naalakkersuisuniit Inatsisartuniluunniit aaqqiissutissarpiamik ilivitsumik arlaannaanulluunniit peqanngilaq. Taamaattumik immaqa aamma misilittaaqqittarnerit aqqusaarneqartariaqarput piffissami aggersumi, Naalakkersuisut siulittaasuat Kuupik Kleist oqarpoq.
Kommuneqarfik Sermersuumi borgmesterip Asii Chemnitz Narupip innuttaasut oqartussaaqataanerat nukittorsarniarlugu periarfissat nutaat oqaluusererusuppai, soorlu illoqarfinni siunnersiuisooqatigiit pilersinneqarnissaat oqalliseqataaffigiumallugu.
- Soorlu nunaqarfinni aqutsisoqarnermut assigusunik aaqqissuussisariaqartugut illoqarfitsinni isumaqarput, taamaammat ullut uku, aamma naalakkersuisunik oqaloqateqarsinnaaneq pingaartorujussuupput, Asii Chemnitz Narup oqarpoq.
