Tamaat isigalugu: Nunatta Qitornai kommunini marlunni qinigassangortittut
Nunatta Qitornaasa Vittus Qujaukitsoq siuttoralugu partiip qineqqusaarnissamut pilersaarutai Nuummi Katuami sisamanngornermi saqqummiuppaat.
Partii Vittus Qujaukitsup Siumumi siulittaasunngorniunnermi Kim Kielsenimut ajorsarnermi kingornatigut 2017-imi pilersippaa.
Taassuma Siumut qimallugu Nunatta Qitornai pilersippai, namminiilivinnissarlu anguniagaralugu Inatsisartunut qinigassanngortilluni.
Vittus Qujaukitsup Inatsisartunut qinersinermi 698-init taaguulluarneqarneratigut partii iserpoq.
Partiilu siullermeerluni maanna kommunimut qineqqusaalerpoq.
Nunatta Qitornai kommunimut qinersinissamut arfinilinnik qinigassanngortitaqarpoq – kommuninullu marluinnarnut qinigassanngortitaqarluni:
Avannaata Kommuniani Svend Møller qinigassanngortippoq, Kommuneqarfik Sermersuumullu partiip siulittaasua, Vittus Qujaukitsoq, Anders Benjaminsen, Michael Ludvigsen, Mikisoq Pavia Kreutzmann aamma Johanne Adolfsen qinigassanngortillutik.
Nuuk unikaallatsinneqarli
Qinigassanngortittut ilaata, Mikisoq Pavia Kreutzmannip Kommuneqarfik Sermersuup Nuummik ukkatarinninnera unikaallatsinniarpaa, kommunimilu illoqarfiit nunaqarfiillu allat ukkataritikkusullugit.
Assi: Malik Brøns / KNR.
- Nuummi 2030-mi 30.000-inik inoqalernissaa kommunip pilersaarutigaa. Sooq taama amerlatigissappat? Sineriak atorunnaarsinneqarniarpa? Pilersaarut taanna unikaallatsitsigu sumiiffiillu allat ineriartortillugit, taanna oqarpoq.
Billede: Malik Brøns / KNR.
73-inik ukiulik, Michael Ludvigsen Kommuneqarfik Sermersuumi kommunimut qinigassanngortippoq.
Taanna 80-ikkunni inuusunnerugallarami imigassamik aanngajaarniutinillu atornerluisuusimavoq. Tamanna 90-ikkunni qaangerpaa ullumikkullu peqqilluni. Taassuma kommunimi utoqqaat peqqissusaat pitsanngorsarusuppaa.
Svend Møller nunatta avannaani qinigassanngortitut marluk aapparaa. Taassuma nunap immikkoortuani inuussutissarsiorneq pioreersoq atorluarneqartikkusuppaa. Inuussutissarsiornermi tassani takornariaqarneq, aalisarneq aatsitassarsiornerlu ilaapput.
- Aalisagarpassuaqarfinni aalisakkerivinnik pilersitsisoqassaaq. Takornarianut aalajangersimasumik takornarianut soqutiginarsinnaasunik ornigarneqartoqarpat taava takornarianik tassungatitsisoqarli. Sumiiffimmilu aatsitassanik piiaasoqarnissaanut periarfissaqarpat aatsitassarsiorfimmik ammaasoqarli, Svend Møller oqarpoq.
Nunatsinni kommunit amerlanerulersinneqarlik
Vittus Qujaukitsorlu pilersaaruteqarpoq: Partiip kommunit amerlanerulerseqqikkusuppai.
Assi: Malik Brøns / KNR.
Nunatsinni kommunit aaqqissuussaanerat nutaaq 2019-imi januaarip aallaqqaataani atuutilerpoq, tassanilu kommunit 18-it sisamanngortinneqarlutik. Qaasuitsup Kommunia 2018-imi marlunnut avinneqarpoq, taamaalilluni nunatsinni kommunit maanna tallimaallutik.
Vittus Qujaukitsup oqarnera naapertorlugu kommunit amerlanerutillugit najugaqarfiit ataasiakkaat inuerukkiartortut pitsanngorsarneqassapput innuttaasunullu sullissineq pitsaanerulissalluni.