Tamaat ataatsimut: Sapaatip akunnerani matumani uani akiuussuserneqarsinnaavutit

Nunatsinni tunillatsissimasut maanna 37-upput – nunatsinnilu coronamik siorna marsimi tunillatsissimasoqaqqaarneranit aatsaat taama amerlatigalutik.

Innuttaasut 38 procentii akiuussutissamik siullermeertumik suli kapitinneqanngillat.

Nuummi siusinnerusukkut amerlanerpaanik tunillatsissimasoqarnikuuvoq. Tamannalu maanna allanngorpoq. Nun.gl-imit kisitsisit nutaat naapertorlugit Avannaata Kommuniani maanna tunillatsissimasoqarnerpaavoq.

Tunillatsissimasut taakku Upernavimmiillutillu Tasiusamiipput, sumiiffinniillu taakkunannga misissugassat ippassaq akissutersineqartut takutippaat Upernavimmi sisamanik nunaqarfimmilu Tasiusami arfineq-pingasunik nutaanik tunillatsissimasoqartoq. Taakku sioqqullugit Upernavimmi sisamanik tunillatsissimasoqareerpoq, taamaalilluni nunatta avannaani covid-19-imik tunillatsissimasut katillugit 16-iulerlutik, illoqarfiit pingaarnersaanni tunillatsissimasut katillugit qulingiluaapput.

AAMMA ATUARUK Avannaani tunillatsittut nutaat 12-it

- Kalaallit Nunaanni pisuni amerlasuuni takuarput inuit allanik tunillaasartut suli namminneq tunillanneqarsimanerminnik pasitsaassisimanatik, Nakorsaaneqarfimmit nakorsaq, Paneeraq Noahsen oqarpoq.

- Tassa taanna katersuunnissat killilersuiffigineqarnerinut ilaatigut patsisaavoq. Matumani inuit pineqartut tassaapput, ataatsimuualaarnerni peqataasut, tunillaassuinermik aallartitsineq ilisimanagu.

Nakorsaaneqarfiup nunatsinni innuttaasut tamarmik akiuussutissamik kapitinnissaannik kaammattuuteqarfigeqqippai.

- Tunillaassuunneq qiviarutsigu tassani akiuussuserneqarsimanngitsut taakkuunerupput tunillatsittartut aammali allanik tunillaassuisuusut. Taamaattumik innuttaasut tamaasa, sumiiffinni akiuussutissamik neqerooruteqarnermut akuerseqqullugit kaammattorumavagut. Upernavimmi innuttaasut 36 procentiisa missaat kisimik akiuussutissamik kapitissimapput, taakku nunatta sinneranut sanilliullugit ikinnerungaatsiarput, Paneeraq Noahsen oqarpoq.

Nuummi akiuussutissamik kapuinerit juulimi takkutiinnarfissatut aaqqissuunneqarput. Tullianilu sisamanngorpat kapuisoqassalluni. Matumani akiuussutissamik kapuiartortut sapaatip akunnerani matumani sumut angalanissaat takusinnaavat. Taakku pillugit nun.gl-imi annerusumik atuagaqarsinnaavutit.

Ullumi:

• Kapueqqinneq (Aappassaanik kapuineq) Qaqortumi. Tamanna Tasersuup Atuarfia nalunaaqutaq 10.30-17.00-imut aaqqissuunneqassaaq.
• Aasianni napparsimmavimmut nalunaaqutaq 13-imit 17-imut takkuttunut tamanut akiuussusersuisoqassaaq.
• Paamiuni 16-ileereersimasunut tamanut timersortarfimmi nalunaaqutaq 9-imit 18-imut neqeroortoqassaaq. Piffissaq inuuip nalaa takkuffigineqassaaq (Paamiut uani toorlugu).

Sisamanngorneq:

• Nuummi Modernamik akiuussuserneqarusuttunut tamanut timersortarfik Inussivik nalunaaqutaq 10-imti 17-imut ammassaaq.
• Sisimiuni 16-inik 17-inillu ukiullit piffissamik inniminniisimagunik akiuussuserneqarsinnaapput, Qaqortumilu aappassaanik kapitittoqarsinnaassalluni.

Tallimanngorneq:

• 18-ileereersimasut tamarmik Narsarsuarmi akunnittarfimmut takkullutik nalunaaqutaq ullaakkut qulingiluanit aqqanermut takkussinnaapput.

Coronamut killiffik pillugu ullumi nalunaaqutaq ataatsimut tusagassiortunik katersortitsisoqassaaq.

Naalakkersuisut siulittaasuat, Muté B. Egede, peqqinnissamut naalakkersuisoq Kirsten Fencker kiisalu Nakorsaaneqarfimmit Paneeraq Noahsen peqataassapput.