Tallimanngorpat Katuami meeqqanut isiginnaartitsissapput
Tasiilami suliniut pillugu akisussaasuuvoq Lana Hansen tassanilu peqataasut arfinillit ilagalugit Nuummukarpoq marloriarlutillu Katuami takutitsiniarput. Siullermik nalunaaqutaq 16.00 aappassaanniillu nalunaaqutaq 17.15. Tamatigut iserneq akeqartassanngilaq.
- Suliniutip isumassarsiarineranut tunngaviuvoq ukiut kingulliit silaannaap allanngornerata nunarsuaq tamaat oqallisaalersup nunarput annerusumik minnerusumilluunniit sunnermagu. Taamaammat meeqqat inuusuttullu silaannaap allanngoriartornera pillugu suliniarfiginissaat piukkunartissimavaat, Lana Hansen oqarpoq.
Meeqqat inuusuttullu nammineq piumassutsimik peqataasut 19-it Tasiiami 2011-mi sammisaqartinneqarput. Ullut qulit sammisaq suliarereerlugu isiginnaagassiaq meeqqat angerlarsimaffiata timersortarfeeraani takutinneqarpoq. Tamannalu iluatsilluaqaaq.
- Meeqqat inuusuttullu peqataanertik assut pissarsiaqarfigaat, meeqqallu isumassarsinerat, piumassuseqalernerat, ataatsimoortutut misigisimalernerat, malinnaalluarnerat nuannaarnerallu qitilluni takutitsinermi malugaarput. Minnerunngitsumik meeqqat imminnut tatiginerat nalilittullu imminnut isiginerat assut qaffariarpoq sungiusarnermi sammisaqarnermilu, sammisaqarnerlu pillugu innuttaasut aamma soqutiginnilerput, Lana Hansen oqarpoq, kajumissaarutigalugulu soqutiginnittut Katuamut isiginnaariaqqullugit.
Meeqqat arfinillit Tasiilameersut saniatigut peqataapput qitimmik ilitsersuisoq Elle Sofe Henriksen, sceneliortartoq Joar Nango kiisalu Tasiilami attaveqaataasoq aamma Tasiilami suleqataasoq Nunnuma Olsen, nipilerisuullutillu nipimik suliaqartut Ole Kristiansen aamma Randi Broberg filmimik aamma suliaqartoq.
