DM: Talermittaannermi kalaaleq pissartanngortoq
Talermittaannermi danskit arfininngormat pissartanngorniunneranni kalaaleq pissartanngorpoq.
Allattoq Paninnguaq Steenholdt
Danmarkimi Københavnimi pissartanngorniunnermi kalaallit marluk peqataapput. Sermitsiaq.AG taama allappoq.
Mikkel Andersen klubbimit 'The Eskimo Warriors'-imeersoq pingasunik ujaminnappoq.
75 kilomik talerpimmik saamimmillu unamminermi marlunnik kuultinnappoq, 85 kilomillu saamimminik unamminermini bronzennalluni.
- Ajugaalluni nuanneqaaq, naak unamminerma ilaani kukkulaaraluarlunga ingerlanera naammagisimaaqaara, Mikkel Andersen Sermitsiaq.AG-mut oqarpoq.
Taanna talermittaannermi Danmarkimi pissartanngorniunnermi aappassaa peqataavoq. 2015-imi peqataanermini marlunnik kuultinnappoq.