Talebanit tapersersortaalu pissaaneqaraluttuinnarput

Asif Ali Sadari, Benazir Bhuttop nuleernera, Pakistanimilu partiimi kisermaassilluni naalakkersuisuutitaqalersumi maannakkut siulittaasoq, oqarpoq, nunarsuarmioqatigiit Talebaninut ajorsalersut. Sadari sapaatip akunneri marluk qaangiuppata præsidentimut qinigassanngortissaaq. Naalagaaffiup sakkutuui 130.000-it Pakistanip avannaata kippasinnerusortaani talebaninik piffissaq kingulleq akiuiniaraluaramik iluatsitsinngillat. Sumiiffinni assigiinngitsuni siuttuusut eqqisseqatigiinnissamut naalakkersuisunik isumaqatigiinniarnernik unitsitsigamik naalakkersuisut kisiisa pinnagit naalagaaffilli tamaat sanngiillisippaat. Akersuunnerit kingunerannik inuit 300.000-it angerlarsimaffimminniit qimaasariaqarsimapput. Taamaammat naalakkersuisut nunarsuarmioqatigiinnut ikioqqupput, partiillu naalakkersuisuutitallit aappaat naalakkersuisooqataajumajunnaarmat naalakkersuisut annertuumik sanngiillipput. Partiip tunuartup siuttuata Sadari neriorsuilussinnartuarmat qatsullugu tunuarpoq, soorlu eqqartuussisuunerit 60-it Musharrafip soraarsitaasa atorfinitsinneqaqqinnissaannut isumaqatigiissut malinngilaa. Eqqartuussisuunerit qullersaat Sadarip qunuginnguatsiarpaa, taassumami Sadarimik akiliilluni iluanaapilunniarsimasutut unnerluussinerit ingerlannikuuai. Maannakkulli tassa Sadari præsidentinngorniarsarivoq, illuatungiliuttulli siulittaasuata Sharifip tamanna piumanngilluinnarpaa.