Takussutissiineq: Spiralilersuisimanermik suliaq Danmarkip taarsiinissaanik nunatta piumasaqarneranit suliat sisamaraat
Arnat 67-it spiralilersuisimanermik mamianartuliameersut Danmarkimit katillugit 20,1 millioninik taarsiivigineqarnissamik piumasaqarput.
Taamaaliorput isumaqaramik inuttut pisinnaatitaaffitik unioqqutinneqarsimasut.
- Suliaq manna ilungersunartorujussuuvoq, tassami suliaq Danmarkip naalagaaffiata kalaallinik akuersititseqqaarani naartusinnaajunnaarsitsineranik tunngassuteqarpoq, eqqartuussissuserisuat Mads Pramming KNR-imut oqarpoq.
Arnat tamarmik immikkut 300.000 koruuninik piumasaqarput.
Taamaalilluni nunatsinni innuttaasut qanga ajortuliaasimasunut taarsiivigineqarnissamik piumasaqarnerisa sisamaraat.
Avanersuarmut tunngatillugu suliaq
Avanersuarmut tunngatillugu suliaq siullersaavoq, taanna 1996-imi aallartinneqarluni. Suliaq inuit 116-it Uummannamiit Qaanaamut pinngitsaalisamik 1953-imi nuutsinneqarsimanerannut tunngassuteqarpoq.
Eqqartuussiviit qullersaannit 28. novembari 2003-mi eqqartuussinermi naqissuserneqarpoq nuutsitsineq tassaasoq naalagaaffiup pinngitsaaliilluni nunamik piginnikkunnaarsitsinera.
Pinngitsaalisaallutik nuutsinneqarsimasut katillugit 500.000 koruuninik 1999-imi taarsiivigineqarput.
Taamanili suliat saqqummillattaalerput.
Meeqqat misileraataasimasut
Meeqqat misileraataasimasutut taaneqartartut 28. februaari 2022 tamarmik immikkut 250.000 koruuninik taarsiivigineqarput.
Suliaq meeqqanut kalaallinut 22-nut 1951-imi ilaquttaminnit Danmarkimut aallartinneqarsimasunut tunngassuteqarpoq. Aallartitsinerup siunertaraa danskisut oqaasilinnik pikkorivissunik pilersitsinissaq uterunik Kalaallit Nunaata ineriartorneranut iluaqutaasussanik.
Meeqqat sisamanit qulingiluanut ukioqarput. Arlaannaalli ilaquttaminnut utertinneqanngillat. Taarsiullugu nunatsinni meeqqat angerlarsimaffianniilerput ilaqutariinnilu paarsisartuniilerlutik.
Ilarparujussui misigisaminnit kingunerluuteqarput arlallillu kingorna imminnut toqussimallutik.
Taakkunannga arfinillit suli inuupput taarsiivigineqarnerullu saniatigut statsminister Mette Frederiksenimit utoqqatserfigineqarlutik.
Inatsisitigut ataataqanngitsut
Juunimi 2022-mi kalaallit inatsisitigut ataataqanngitsut 26-t Danmark eqqartuussivimmut tunniuppaat, isumaqaramik ilaqutariittut inuusinnaatitaanertik innarlerneqarsimasoq. Tamarmik immikkut 125.000 koruuninik taarsiivigeqqupput.
Inatsisitigut ataataqanngitsut tassaapput angutinit kalaallinit kiisalu tikittunit danskinit, amerikamiunit allanillu meerartaarineqarsimasut, 1950-ikkunni 1960-ikkunnilu kalaallinik arnanik meerartaaqateqarlutik.
Kingorna angutit tammarput. Meeraat kina ataatarinerlugu ilisimanissaanut pisinnaatitaaffeqanngillat, taamaammallu kingornussisinnaanatik kinguliaannilluunniit ateqalersinnaanatik.
Taarsiivigineqarnissamik piumasaqaat Danmarkimit ukioq manna 30. marsi itigartitsissutigineqarpoq.
